१९ माघ, वीरगञ्ज । वीरगञ्जको सुपर ग्यास उद्योगमा गत पुस ५ गते भएको आगलागीमा ज्यान गुमाउनेको परिवारलाई सांसद प्रदीप यादवले जनही १ लाख रुपैयाँ सहयोग गरेका छन् ।
आगलागीका क्रममा मृत्यु भएका वीरगञ्ज महानगरपालिका कार्यालयका बारुणयन्त्र शाखाका ३ जना कर्मचारीका परिवारलाई सहयोग हस्तान्तरण गरिएको वीरगञ्ज महानगरपालिकाका मेयर विजय सरावगीले जानकारी दिए ।
सांसद यादवले घटना अत्यन्त दुखद रहेको भन्दै पीडित परिवारको घाउमा मल्हम लगाउने प्रयास गरेको बताए । ‘मैले गरेको सहयोगले क्षतिको परिपूर्ति हुन त सक्दैन, तै पनि मैले उहाँहरुको सम्मानका लागि मैले रकम प्रदान गरेको हुँ’ उनले भने ।
आगलागी भएकै दिन सांसद यादवले मृतककका परिवारलाई जनही एक लाख र घाइतेहरुलाई जनही ५० हजार रुपैयाँ दिने घोषणा गरेका थिए ।
वीरगञ्ज महानगरपालिकाले मृतकका परिवारजनलाई राहतसंगै आश्रति परिवारका सदस्यमध्ये एक जनालाई महानगरपालिका कार्यालयमै जागिर र बालबालिकाको पढाईको खर्च समेत बेहोर्ने भएको छ ।
यसअघि नै महानगरपालिका कार्यालयले मृतकका परिवारलाई जनही २ लाख रुपैयाँ र सुपर ग्यास उद्योगले १ लाख रुपैयाँ आर्थिक सहयोग गरिसकेको छ ।
