१३ फागुन, काठमाडौं । नेपाली कांग्रेस संसदीय दलको नेता चयनका लागि २१ गते चुनाव हुने भएको छ ।
आइतबार पार्टी कार्यालय सानेपामा बसेको केन्द्रीय कार्यसमिति बैठकले संसदीय दलको संशोधित विधान अनुमोदन गरेको छ भने दलको नेता चयनका लागि तीन सदस्यीय निर्वाचन समिति बनाएको छ ।
चीनकाजी श्रेष्ठ संयोजक रहेको समितिको सदस्यमा नवीन्द्रराज जोशी र भीष्मराज आङ्दाम्बे छन् ।
कांग्रेस संसदीय दलको नेतामा सभापति शेरबहादुर देउवा स्वभाविक उम्मेदवार छन् भने पूर्वमहामन्त्री प्रकाशमान सिंहले पनि उम्मेदवारी दिने बताएका छन् ।
देउवा पक्षका केही नेताहरुले भने पार्टी महामन्त्री डा. शशांक कोइरालालाई सर्वसम्मत रुपमा दलको नेता बनाउने लबिङ गरेका छन् ।
कोइरालाले पनि सर्वसम्मत रुपमा भए आफू संसदीय दलको नेता बन्ने सार्वजनिक अभिव्यक्ति दिएका छन् ।
