२ जेठ, काठमाडौं । कर्नाटकमा भारतीय जनता पार्टी (भाजपा)को सरकार बन्ने भएको छ । कर्नाटक प्रदेश प्रमुख बजुभाइ वालाले भाजपालाई सरकार गठनको निम्तो दिएका हुन् ।
भाजपाका बीएस यदुरप्पाले बिहीबार बिहान ९ बजे कर्नाटकको मुख्यमन्त्रीको रुपमा सपथ ग्रहण गर्ने भएका छन् ।
हालै भएको विधानसभा निर्वाचनमा १०४ सिट जित्दै भाजपा सबैभन्दा ठूलो दल बनेको थियो तर ८ सिट कम हुँदा उसको बहुमत पुग्न सकेन । त्यसैले १५ दिनभित्र बहुमत देखाउन भाजपालाई प्रदेश प्रमुखले भनेको भारतीय समाचार संस्थाहरुले जनाएका छन् ।
२२४ सिटमध्ये २२२ सिटमा शनिबार निर्वाचन भएको थियो । सो निर्वाचनमा अमित शाह नेतृत्वको भाजपाले १०४, राहुल गान्धी नेतृत्वको कांग्रेसले ७८, एचडी देवेगाैडा नेतृत्वको जनता दल सेक्यूलर (जेडीएस)ले ३८ सिट जितेका थिए ।
भाजपाको बहुमत नपुग्ने भएकाले अब जेडिएसका सांसदलाई आफूतिर तान्ने दाउमा भाजपाका नेताहरु लागेका छन् । त्यसैको प्रयास स्वरुप बुधबार साँझ भाजपा र जेडिएसका नेताहरुबीच वार्तासमेत भएको थियो ।
