Comments Add Comment

साउनदेखि कलंकीको जाम हट्ने, कोटेश्वरमा जाम बढ्ने

कोटेश्वरमा सुरुङ नबनाएसम्म जाम घट्दैन : सडक विभाग

१४ असार, काठमाडौं । राजधानीको पूर्वी नाकातर्फ अवस्थित कोटेश्वरमा यतिबेला जामले हैरानी पार्ने गरेको छ ।

बिहानैदेखि सवारीको चाप बढ्ने कोटेश्वरको जाम अब साउनदेखि घट्ने होइन, झनै बढ्ने सरकारी अधिकारीहरु बताउँछन् ।

सडक विभागले कलंकीमा अन्डरपास निर्माणको काम अन्तिम चरणमा पुर्‍याएको छ । साउनबाट अन्डरपास-वे चलाउने सडक विभागले तयारी गरिरहेको छ । त्यहाँको अण्डरपास खुलेपछि कोटेश्वरको जाम अरु बढ्ने भएको हो ।

कलंकीको अण्डरपासले कोटेश्वरमा कसरी बढ्छ जाम ?

सडक विभागका महानिर्देशक रवीन्द्रनाथ श्रेष्ठका अनुसार अबको १० दिनभित्रै कलंकी अन्डरपास-वे निर्माणको काम सकिनेछ । साउनबाट त्यसलाई सञ्चालन गर्न विभागले चीनसँग अनुरोध गरिरहेको छ ।

अन्डरपास-वे सञ्चालन भएपछि कलंकी चोकमा सवारी आवागन निकै सहज हुनेछ । तर, जति सजिलो कलंकीमा हुनेछ, त्यति नै अप्ठ्यारो अब कोटेश्वरमा हुनेछ ।

अहिले कलंकीमा एउटा गाडीलाई कम्तिमा आधा घण्टा जाममा बस्नैपर्ने बाध्यता छ । पिक आवरमा त एक घन्टासम्म गाडीहरु कलंकीमै रोकिने गरेका छन् । अण्डरपास खुलेपछि कलंकीबाट सजिलैसँग गाडीहरु पास हुनेछन् ।

तर, अन्डरपास सञ्चालन भएपछि त्यहाँबाट छुटेका गाडीहरु अब कोटेश्वरमा गएर थुप्रनेछन् । अर्थात, कलंकीको अण्डरपास सञ्चालनमा आएपछि अब कोटेश्वरबाट बालकुमारीतर्फ गाडीको चाप निकै बढ्नेछ ।

उसै पनि कोटेश्वरमा पिक आवरमा अहिले दुई घण्टासम्म जाममा बस्नुपर्ने बाध्यता छ । खासगरी वीपी राजमार्ग भएर पूर्व जाने, अरनिको राजमार्गमा चल्ने तथा भक्तपुर र काभ्रेका ग्रामीण भेगमा जाने सवारीको चापले काटेश्वरमा सास्ती बढेको छ ।

धुलिखेतर्फबाट आउने गाडीहरु भक्तपुरको ६ लेनको सजिलो बाटोबाट छिट्टै काटेश्वर आइपुग्छन् । तर, चोकमा आइपुग्नुअघि नै लामो समय जाम बस्नुपर्ने बाध्यता छ ।

त्यसैगरी रिङरोड भएर आउजाउ गर्ने सवारीको संख्यामा पनि बढेको बढ्यै छ । रिङरोड विस्तारका कारण कलंकीबाट कोटेश्वरसम्म सहज रुपमा गाडी आउनेछन् । तर, कोटेश्वर चोकले ती गाडीहरुको चापलाई थाम्न सक्ने अवस्था छैन ।

अब कलंकीको अण्डरपास चलेपछि त्यताबाट आएका गाडीको लाइन पनि बालकुमारी पुलसम्मै पुग्ने आँकलन ट्राफिक प्रहरीको छ । यस्तो अवस्थामा ट्राफिक व्यवस्थापन कम्ति चुनौतिपूर्ण हुनेछैन ।

के छन् त विकल्प ?

सडक विभागले कोटेश्वरको जाम हटाउन विभिन्न विकल्पहरु माथि विचार गरिरहेको छ । विभागमा महानिर्देशक श्रेष्ठ दीर्घकालीन रुपमा कोटेश्वरमा सुरुङ बनाएरमात्रै जामको समस्या हल गर्न सकिने बताउँछन् । त्यसबारे यो वर्षको बजेटले पनि बोलेको छ ।

तर, तत्कालका लागि भने कोटेश्वर चोकमा आएर रिङरोडतर्फ जाने गाडीलाई जडीबुटीबाटै डाइभर्ट गर्नेगरी भौतिक संरचना विकासको योजना पनि विभागले बनाएको श्रेष्ठ बताउँछन् ।

‘विद्यमान सडकलाई सुधार गरेर मनहरातिरबाट गाडी डाइभर्ट गर्न सकियो भने कोटेश्वरको जाम हट्छ कि ?’ श्रेष्ठ भन्छन्, ‘हामीले यसबारे अध्ययन गर्नुपर्नेछ । साउनबाट त्यसका लागि काम सुरु गर्छौं । र, सम्भव भएसम्म वैकल्पिक सडकलाई प्रयोग गर्न प्रोत्साहित गर्ने योजना छ ।’

त्यस्ता वैकल्पिक सडकका कतिपय स्थानमा बेलिब्रिज हाल्नुपर्ने हुन सक्ने श्रेष्ठले अनलाइनखबरलाई बताए । अहिले स्थानीय तहले बनाएका पुलहरुले धेरै सवारीको चाप थेग्न नसक्ने भएकाले बेलिब्रिज बनाएरै भए पनि सवारीलाई विकल्प दिने अवधारणा तयार गरिएको हो ।

सडक विभागले जडीबुटीबाट कोटेश्वर आउने सडकको दायाँबायाँ एक-एक लेन थप गर्न सकिन्छ कि भनेर अध्ययन गरेको छ । तर, त्यसका लागि एयरपोर्टको जग्गा चाहिने भएकाले नेपाल नागरिक उड्ययन प्राधिकारणसँग छलफल गर्नुपर्ने महानिर्देशक श्रेष्ठले बताए ।

‘प्राधिकरणले जग्गा दियो भने लेन थप्न सकिन्छ । त्यसले पनि ट्राफिक व्यवस्थापन केही सहज हुन सक्छ,’ श्रेष्ठले भने, ‘तर, यसमा छलफल हुन बाँकी नै छ ।’

विभागले कोटेश्वरमा अस्थायी र सस्तो प्रकारको आकाशे पुल निर्माणका लागि विचार गरिरहेको छ ।

‘केही घण्टा त पैदल यात्रुलाई सडक वारपार गराउँदै पनि समय जान्छ । त्यसैले पुरानो बसपार्कमा जस्तै पछि झिक्न मिल्नेखालको पुल बनाएर पैदल यात्रुको व्यवस्थापन पनि गर्न सकिन्छ,’ श्रेष्ठले भने, ‘हामीसँग भएका विकल्पहरुमा साउनबाट मात्रै काम सुरु गर्न सक्छौं ।’

यो खबर पढेर तपाईलाई कस्तो महसुस भयो ?

ट्रेन्डिङ

Advertisment