२४ असार, काठमाडौं । जिल्ला प्रहरी कार्यालय, पर्साले मोटरसाइकलको पेट्रोलको ट्याङ्कीमा लुकाएर ल्याउँदै गरेको अवस्थामा अवैध भारू ८ लाख १ हजार दुई सयसहित एक जनालाई पक्राउ गरेको छ ।
पक्राउ पर्नेमा भारतको बिहारस्थित मोतिहारी, ग्राम सुगौली-११ का २८ वर्षीय अभिजितकुमार सर्राफ छन् ।
रक्सौलतर्फबाट वीरगञ्ज आउँदै गर्दा उनलाई विशेष सूचनाको आधारमा बीआर०५के ६४४४ नम्बरको पल्सर मोटरसाइकलमा हिँड्दै गर्दा पक्राउ गरिएको जिल्ला प्रहरी कार्यालय, पर्साले जनाएको छ ।
उनले मोटरसाइलको तेलको ट्याङ्कीको आधा भागमा पेट्रोल र अर्को भागमा अवैध भारतीय रुपैयाँ लुकाएर ल्याउँदै गरेको अवस्थामा बरामद गरिएको बताइएको छ ।
पक्राउ परेका सर्राफलाई थप अनुसन्धान र कारबाहीका लागि राजश्व अनुसन्धान विभाग, पुल्चोक ल्याएको छ ।
