१८ कात्तिक, काठमाडौं । इंग्ल्याण्डका सर्वाधिक गोलकर्ता वायन रुनी झण्डै दुई वर्षपछि राष्ट्रिय टिममा परेका छन् ।
अन्तर्राष्ट्रिय खेलबाट सन्यास लिन लागेका रुनीलाई अर्को महिना अमेरिकाविरुद्ध हुने खेलका लागि टिममा राखिएको हो ।
३३ वर्षका रुनीले २००३ देखि २०१६ सम्मको १ सय १९ खेलमा इंग्ल्याण्ड राष्ट्रिय टिमबाट कीर्तिमानी ५३ गोल गरेका छन् । नोभेम्बर २०१६ मा स्कटल्याण्डलाई ३-० ले हराएको खेलपछि उनी राष्ट्रिय टिममा थिएनन् ।
अमेरिकासँगको मैत्रीपूर्ण खेलबाट ‘वायन रुनी फाउण्डेसन’का लागि रकम संकलन पनि गरिने छ ।
म्यानचेस्टर युनाइटेड र इभर्टनका पूर्व खेलाडी रुनी अहिले अमेरिकामा नै व्यवसायिक क्लब फुटबलमा आबद्ध छन् । गएको जुलाईमा डीसी युनाइटेड गएपछि उनले क्लबका लागि १२ गोल गरिसकेका छन् ।