२२ कात्तिक, काठमाडौं । अमेरिकाको क्यालिफोर्नियास्थित एक बारमा अन्धाधुन्ध गोली प्रहार हुँदा एक प्रहरी अधिकारीसहित कम्तीमा १२ जनाको मृत्यु भएको छ ।
क्यालिफोर्नियाको थाउजेन्ड ओक्सस्थित बोर्डरलाइन बारमा एक बन्दुकधारीले अन्धाधुन्ध गोली चलाएको अधिकारीहरले बताएका छन् ।
घटनास्थल लस एन्जलसबाट करिव ४० माइल टाढा छ । घटनामा अरु १० जना घाइते भएका छन् ।
घटनामा संलग्न भनिएका व्यक्ति पनि मृत अवस्थामा भेटिएको तर, उनको पहिचान हुन बाँकी रहेको अधिकारीहरुले बताएका छन् । साथै बारमा प्रवेश गरेर अन्धाधुन्ध गोली चलाउनुका कारण समेत खुल्न सकेको छैन ।
घटना भएको बेला बारमा झण्डै २०० मानिस थिए ।
