१२ माघ, काठमाडौं । दोस्रो एकदिवसीय क्रिकेटमा नेपालले यूएईमाथि शानदार जित हात पार्दा सोमपाल कामीले नयाँ बेञ्चमार्क कायम गरेका छन् ।
नेपालले २४३ रनको लक्ष्य पछ्याएको यूएईलाई सुरुमा नै सोमपालले नराम्रो झड्का दिए ।
उनले लगातार चार ओभरमा चार विकेट लिएका थिए । पहिलो ओभरको अन्तिम बलमा चिराग सुरीको विकेट लिएका उनले तेस्रो ओभरको पाँचौं बलमा गुलाम सावेरलाई पभेलियनको बाटो देखाए । पाँचौं ओभरको अन्तिम बलमा साइमन अनवर र छैटौं ओभरको पहिलो बलमै अस्फाक अहमदलाई शिकार बनाए ।
२० औं ओभरको तेस्रो बलमा सोमपाल कामीले जहोर खानको विकेट लिँदै खेल टुंग्याए ।
यससँगै सोमपाल एकदिवसीय म्याचमा पाँच विकेट लिने पहिलो नेपाली बलर बनेका छन् । ६.३ ओभर बलिङ गरेका उनले ३३ रन खर्चिएका थिए ।
यसअघि नेदरल्याण्ड्सविरुद्ध पहिलो एकदिवसीय खेल्दा ८.४ ओभरमा ३४ रन खर्चिएर ३ विकेट लिएका थिए ।
