२७ जेठ, काठमाडौं । प्रतिनिधिसभामा प्रस्तुत विनियोजन विधेयकमाथिको छलफल आजबाट प्रारम्भ हुने भएको छ ।
संघीय संसदमा प्रस्तुत बजेटबारे सांसदहरुबीच छलफल गरेर पारित गर्नुपर्ने संवैधानिक प्रावधानअनुरुप संसदमा प्रस्तुत विनियोजन विधेयकमाथि आजबाट छलफल हुन लागेको हो ।
सोमबार बिहान ११ बजे बस्ने बैठकको सम्भावित कार्यसूचीमा मन्त्रालयको बजेटका विभिन्न शीर्षकमाथि छलफल हुने संघीय संसद् सचिवालयले जनाएको छ ।
सचिवालयका अनुसार भूमि व्यवस्था, सहकारी तथा गरिबी निवारण मन्त्रालय, सञ्चार तथा सूचना प्रविधि मन्त्रालय र उद्योग वाणिज्य तथा आपूर्ति मन्त्रालयको बजेटबारे सांसद्हरुले राखेका विभिन्न प्रस्तावबारे आज छलफल हुनेछन् ।
संसद्मा प्रस्तुत विधेयकमा दुर्गा पौडेल, लक्ष्मी परियार, मीनबहादुर विश्वकर्मालगायतका सांसद्हरुले विभिन्न प्रस्ताव राखेका छन् । यही प्रस्तावबारे छलफल हुने र मन्त्रीले जवाफ दिनेछन् ।
यसैबीच, राष्ट्रियसभा बैठक पनि अहिले बिहान ११ बजे बस्दैछ । संसद् सचिवालयका अनुसार, आ.व ०७६ ७७ को राजस्व र व्ययबारे सामान्य छलफल गर्ने सम्भावित कार्यसूची तय भएको छ । छलफलका क्रममा उठेका सवालहरुको जवाफ अर्थमन्त्री युवराज खतिवडा आज आउँदैछन् ।
