Comments Add Comment

नेमार छाड्न चाहँदैनन् एमबाप्पे

१५ असार, काठमाडौं । फ्रेन्च क्लब पीएसजीका स्ट्राइकर केलियन एमबाप्पेले जहाँ भए पनि आउँदो दिनमा आफू अझ बढी जिम्मेवारीका साथ अघि बढ्न चाहेको बताएका छन् । तर त्यसका लागि विश्व स्तरीय खेलाडीहरु आफूसँगै हुनुपर्ने उनको धारणा छ ।

२० वर्षका एमबाप्पेले पीएसजीले आउँदो सिजनका लागि अझ बलियो वातावरण बनाउन आवश्यक रहेको बताएका छन् । खेलाडीहरुको उत्कृष्ट संयोजन, सँगै रहने विश्वस्तरीय खेलाडी सबै मिलाएर अघि बढ्दै च्याम्पियन्स लिग जित्ने र बालोन डिओरमा दाबेदारी दिने उनको इच्छा व्यक्त भएको छ ।

अहिले पीएसजीमा दुई स्टार खेलाडी एमबाप्पे र नेमारबीच देखिएको प्रतिस्पर्धा व्यक्तिगत रुपमै जाला कि भन्ने डर बढीरहेका बेला क्लबकै लागि पनि यस्तो अवस्था सम्हाल्न सहज भने छैन । तर एमबाप्पे भने नेमार साथै नहुँदा आफूहरु कमजोर बन्ने डरमा देखिन्छन् ।

उनीहरुबीच मैदानमा हुने सहकार्यसँगै व्यक्तिगत रुपमा पनि अहिलेसम्म राम्रो सम्बन्ध छ । दुवै एकअर्काका प्रशंसक नै हुन् । केही दिनअघि नेमार घाइते रहेकाले कोपा अमेरिका गुमाउने भएपछि एमबाप्पेले उनलाई सान्त्वना दिँदै सन्देश लेखेका थिए ।

एमबाप्पे नेयमार आफूसँगै रहँदा मैदानमा सहज हुने खुला रुपमा नै बताउँछन् । त्यसैले उनको धारणा छ, ‘आउने सिजन पनि नेमार पीएसजीमै रहुन् र आफूसँगै खेलुन् ।’
नेमारले क्लब छाड्ने खबरहरु आइरहँदा एमबाप्पेले नेयमारलाई क्लबमै देख्न चाहनुले पनि पीएसजी व्यवस्थापनमा थप छलफल हुने देखिन्छ । प्रशिक्षक थोमस टुखललाई दुवै खेलाडीलाई प्रतिस्पर्धात्मक वातावरणमा मिलाएर लान सहज नभएरै नेमार बाहिरिने कुरा अझ बलियो बनेको हो ।

पीएसजीका अध्यक्ष नासेर अल खेलाफी पनि नेमारलाई किनेको भन्दा कममा बेच्न तयार छैनन् । त्यसैले उनको भाउ आउने सिजन झनै घट्न पुग्ने डरले यो सिजनमा नै बेच्न उपयुक्तसमेत ठान्छन् । किनभने क्लब खेलाडीभन्दा अघि नै आउँछ ।

मैदानमा पेनाल्टी र फ्रिकिककै लागि नेमार र एमबाप्पेबीच प्रतिस्पर्धाको अवस्था आउने भएमा प्रशिक्षक थोमसलाई अझ कठीन हुँदै जाने छ । यसैले थोमसले भनेका छन्, ‘यदि कोही जान चाहन्छ भने उसको लागि बाटो खुला छ ।’

अध्यक्ष खेलाफीले पनि भनेका छन्, ‘हामी अब कोही ‘सेलिब्रिटी’ चाहँदनौं, जो योजना मान्न तयार छैनन्, उसले छाड्न सक्छ ।’

यो खबर पढेर तपाईलाई कस्तो महसुस भयो ?

ट्रेन्डिङ

Advertisment