१६ असार,काठमाडौं । अस्पतालबाट घर फर्किदै गर्दा यात्रुले छोडेको नगद र औषधि फिर्ता नगर्ने ट्याक्सी चालकलाई ट्राफिक प्रहरीले नियन्त्रणमा लिएको छ ।
शिक्षण अस्पताल, महाराजगञ्जबाट स्वयम्भु नामगेल चोक जाने क्रममा शुक्रबार यात्रु तोण्डु शेर्पाले ७६ हजार नगद र औषधीसहितको झोला ट्याक्सीमा छाडेका थिए ।
नम्बर नखुलेको ट्याक्सीमा समान छुटेको भन्दै शेर्पाले महानगरीय ट्राफिक प्रहरी महाशाखाकामा निवेदन दिएपछि ट्राफिक प्रहरीले खोजतलास थालेको थियो । सीसी टीभी क्यामेराको मद्दतबाट सामान छुटेको तेस्रो दिन ट्याक्सी चालक पक्राउ परेका हुन् ।
सोमबार पक्राउ परेका बा २ ज २४८ नम्बरको ट्याक्सीका चालकले नगदसहित ट्याक्सीमा छुटेका सबै सामान पीडितलाई ट्राफिक प्रहरीको रोहबरमा फिर्ता गरेको जनाइएको छ ।
समान जस्ताको त्यस्तै फिर्ता गरेपछि ट्याक्सी चालकलाई कागज गरेर छाडिएको महानगरीय ट्राफिक प्रहरी महाशाखाका एसपी रविकुमार पौडेलले बताए ।
