२८ असार, रौतहट । भारतले समयमै बाँधका ढोकाहरु नखोल्दा रौतहट पूर्णरुपमा डुबानमा परेको छ । लालबकैया र बाग्मती नदीमा आएको बाढीले सदरमुकाम गौरसहित अधिकांश भाग डुबाएको छ ।
गौरमा शुक्रबार राति नै बाढी पसेको थियो । सदरमुकामका मुख्य सडकमा एक तले घर डुब्ने गरी पानी जम्मा भएको छ भने जिल्ला प्रहरी कार्यालय, सशस्त्र प्रहरीको कार्यालय लगायत प्रहरी युनिटसमेत डुबानमा परेका छन् ।
बाढीले गौरसँगै गरुडा, कटहरीया, मत्सरी, बेलबिछवा, पिप्रा रजबाडा, बडहरवा, बन्जरहा, इनर्वा, लक्ष्मिनिया, मर्यादपुर, बसन्तपट्टी र तेजापाकड डुबाएको छ ।
डुबानका कारण जनजीवन निकै कस्टकर बनेको छ । डुबेर गौर ३ टिकुलियाका शिवमंगल पटेलको मृत्यु भएको जिल्ला प्रहरी कार्यालय रौतहटका प्रवक्ता डीएसपी नविन कार्कीले बताए । मौलापुर नगरपालिकाको वडा नं. १, ३ र ४ मा चार सय घर प्रभावित भएका छन् भने २० हजार बढी विस्थापित भएका छन् ।
भत्किएको बाँध टालियो, ढोका खुलाइयो
नदीमा पानीको बहाव बढेपछि नेपाली सुरक्षाकर्मीहरुले शुक्रबार नै बाँधको ढोका खोल्न आग्रह गरेका थिए, तर भारतीय पक्षले सुनुवाई नगर्दा रौतहट डुबानमा पर्यो ।
शनिबार दिउँसो भारतीय गाउँ भकुरहर नजिकै बाँध फुटेर पानीले निकास पाएपछि गौरमा पानी सतह केही कम भयो । तर भारतीय सीमा सुरक्षा बल (एसएसबी)ले भत्किएको बाँध तत्काल मर्मत गरेको छ । साथै बाँधको ढोका खोलेको छ ।
एसएसबीको क्याम्प नजिकैको बाँधको ढोका आंशिक रुपमा खोलिएको छ भने त्यसभन्दा पूर्व रहेको बाँधको ढोका पूर्णरुपमा खोलेर पानीलाई निकास दिइएको छ ।
बाँध भत्किँदा बस्ती नै बगाउने सम्भावना भएकाले भारतको भकुरहर, मुसाचक लगायतका बासिन्दा पनि बाँधको ढोका खोल्न एसएसबीलाई दबाव दिएका थिए ।
सडक सञ्जाल अवरुद्ध, प्रहरी युनिटहरु सम्पर्कविहीन
सिंगो जिल्ला जलमग्न भएपछि सडक सञ्जाल अवरुद्ध बनेका छन् । विद्युत पनि अवरुद्ध भएको छ । प्रहरी युनिटहरुमा विद्युत आपूर्ति नहुँदा उद्दार प्रभावित भएको छ भने क्षतिको यकिन विवरण समेत आउन नसकेको डीएसपी कार्कीले बताए ।
बाढी प्रभावित क्षेत्रमा नेपाल प्रहरी, सशस्त्र प्रहरी र नेपाली सेनाले बोटको माध्यमले स्थानीयबासीको उद्धार गरेका छन् । तीन वटै सुरक्षा निकायको अलगअलग टोलीले बाढीमा फसेकाहरुको उद्धार गरेर सुरक्षित स्थानमा पुर्याएका छन् ।
