पाककलामा रुची राख्ने यी बलिउडकर्मी

भनिन्छ, आफूलाई चाहानेहरुको मनमा बस्नका लागि उनीहरुको पेट हुँदै अघि बढ्नु पर्छ । त्यसैले त खाना बनाउनु अर्थात कुकिङलाई पनि आफैंमा एउटा अद्भुत कला मानिन्छ । हाम्रो समाजमा कतिपय त्यस्ता व्यक्तिहरु छन्, जो सौखले खाना बनाउँछन् भने अर्कोतिर खाना बनाउने कलालाई पेशा नै बनाउनेहरु पनि प्रसस्त छन् ।

बलिउडमा त केही त्यस्ता कलाकारहरु छन्, जो अभिनयमात्र अब्बल छैनन्, कुकिङमा पनि उत्तिकै सिपालु छन् । ती कलाकारहरुको कुकिङ कलाका बारेमा जानकारी पाउँदा तपाईं पनि अचम्मा पर्न सक्नु हुनेछ ।

अक्षय कुमार

बलिउडका अभिनेता अक्षय कुमार फिल्ममा आउनुअघि व्यवायिक सेफकै रुपमा सक्रिय थिए । फिल्ममा आउनुअघि उनले बैंककमा सेफकै रुपमा काम गरेका थिए । त्यस पछिमात्र उनी अभिनयमा आएका हुन् । उनी आज बलिउडका सफल अभिनेताको रुपमा स्थापित भए पनि उनले भान्सासँगको आफ्नो सम्बन्धलाई अहिलेसम्म तोडेका छैनन् । उनी आज पनि आफ्नो परिवारका सदस्यका लागि आफैं खाना तयार पारिरहेका हुन्छन् ।

अभिषेक बच्चन

ऐश्वर्या राय मात्र होइन, उनका श्रीमान् तथा अभिनेता अभिषेक बच्चनको पनि कुकिङ सौखको विषय हो । उनी आफ्नी श्रीमती झैं मीठा परिकार बनाउन सिपालु छन् । अभिषेकलाई चिकेनका विभिन्न स्वादष्टि परिकारहरु बनाउन आउँछ ।

करीना कपूर खान

बलिउडमा फेसन डिभाको रुपमा स्थापित अभिनेत्री करीना कपूर खान पनि कुकिङकी सौखिन हुन् । करीनलाई भेजिटेरियन (शाकाहारी) खाना बनाउन मन पर्छ । अचम्म लाग्ने कुरा के छ भने करीनाको घरमा आयोजना हुने अधिकांश गेट टुगेदर पार्टीहरुमा आएका आफ्नो परिवारका सदस्य तथा नजिकका साथीहरुका लागि उनी आफैं खाना बनाउने गर्छिन् ।

कंगना रानौत

बलिउड क्वीनको उपनामले चिनिने अभिनेत्री कंगना रानौतको बारेमा धेरैलाई जानकारी नभएको एउटा कुरा के हो भने उनी अभिनयमा जसरी अब्बल मानिन्छिन्, त्यसैगरी उनी भान्सामा पनि त्यत्ति नै अब्बल छिन् । उनी कुकिङकी सौखिन हुन् ।

कंगनालाई पहाडी खाना बनाउन असाध्यै मनपर्छ । एउटा फिल्मको छायांकनको क्रममा उनले एक दिन सम्पूर्ण क्रूका लागि चाइनीज खाना तयार पारेर सबैलाई छक्क पारेकी थिइन् ।

ऐश्वर्या राय बच्चन

आफ्नो सुन्दरताले विश्वभरी नै चर्चित रहन सफल बलिउड अभिनेत्री ऐश्वर्या राय बच्चनले थुप्रै सफल फिल्महरु दिइसकेकी छिन् । ऐश्वर्या एउटी उत्कृष्ट अभिनेत्री मात्र होइनन्, एउटी सिपालु कुक समेत हुन् । उनलाई थुप्रै प्रकारका डिजर्टहरु बनाउन आउँछ । यति मात्र होइन, उनी आफूले बनाउने प्रत्येक परिकारमा कुनै न कुनै प्रकारका एक्सपेरिमेन्टहरु गर्न रुचाउँछिन् ।

अजय देवगण

बलिउडमा सिंघमको उपनामले स्थापित अभिनेता अजय देवगण पनि खाना बनाउन सिपालुमात्र छैनन्, सौखिन पनि छन् । उनी आफूलाई रिल्याक्स गराउनका लागि कुकिङ गर्न मन पराउँछन् । उनलाई चाइनीजदेखि मुग्लाईसम्मका परिकार बनाउन आउँछ ।

शिल्पा शेट्टी

अभिनेत्री शिल्पा शेट्टी बलिउडमा उत्कृष्ट अभिनय गर्ने कलाकारको रुपमा स्थापित छिन् । उनी योगामा पनि पारंगत छिन् भने खाना पकाउने प्रसंगमा पनि उनी एक कदम अगाडि छिन् । खाना पकाउने सौखकै कारण उनी टेलिभिजनको एउटा कुकरी शोमा समेत सहभागि भएकी थिइन् ।

त्यसो त शिल्पा जसरी खाना बनाउन सौखिन छिन्, त्यसैगरी उनलाई थरी-थरीका परिकारका स्वाद चाख्ने सौख पनि छ ।