कलाकार शिवहरि पौडेलको डेब्यु निर्देशनमा चलचित्र ‘लक्का जवान’ निर्माण हुदैछ । किरण केसी, दीलिप रायमाझी र शिवहरि पौडेल चलचित्रका कार्यकारी निर्माता हुन् । कमेडी जनरामा निर्माण हुने यो चलचित्रमा किरण केसी, दीलिप रायमाझी, शिवहरि पौडेल, सुरेन्द्र केसी, वर्षा सिवाकोटी, प्रियंका कार्की, राजाराम पौडेल, सलोन बस्नेत लगायतको अभिनय छ ।
यो चलचित्रको शिर्ष भूमिकामा लागि ‘मह जोडी’लाई प्रस्ताव गरिएको थियो । शिवहरिले सुरुवातमा स्क्रिप्ट भने यो जोडीलाई नै हेरेर लेखेको थियो । तर, हरिवंश आचार्यले ‘लक्का जवान’ खेल्दा आफूलाई समस्या पर्ने भन्दै खेल्न मानेनन् । यो बिषयमा बोल्दै निर्देशक पौडेलले भने–‘हो मैले सुरुवातमा हरिवंश र मदनकृष्ण दाइका लागि नै स्क्रिप्ट लेखेको थिएँ । तर, हरि दाइले नै आफूलाई अन्य ब्यानरबाट पनि अफर आइरहेकाले यो गर्दा अरु पनि गर्नुपर्ने भएकाले समस्या हुने बताएपछि मैले कर गरिनँ ।’
कलाकार हरिवंश आचार्य र मदनकृष्ण श्रेष्ठले ‘मह संचार’ बाहिरको चलचित्रमा काम नगर्ने बताएका थिए । बरु, मह जोडीले शिवहरिलाई आफूहरुकै ब्यानरमा सहकार्य गर्न समेत आग्रह गरेका थिए ।
‘मह संचार’को ब्यानरबाट पछिल्लो समयमा ‘शत्रुगते र दाल भात तरकारी’ निर्माण भएको थियो ।
