२४ पुस, काठमाडौं । अखिल नेपाल फुटबल संघ (एन्फा)को अनुशासन समितिले मनाङ मर्स्याङ्दी र मछिन्द्र क्लबका झगडा गर्ने खेलाडीहरुलाई प्रतिबन्ध गरेको छ ।
मनाङका जगजित श्रेष्ठ र अशोक बराललाई ५/५ खेल तथा रञ्जन विष्टलाई २ खेलका लागि निलम्बन गरिएको छ । बेञ्चमा भएका बराल झगडा गर्न गएका कारण उनले त्यही बेला रातो कार्ड पाएका थिए । त्यसैले उनले थप एक खेल गुमाउनेछन् ।
यस्तै मच्छिन्द्रका दीपक राई, देवेन्द्र तामाङ र विजय धिमाललाई २ खेलमा निलम्बन गरिएको छ ।
यस्तै जगजित र अशोकलाई जनही १० हजार रुपैयाँ जरिवाना पनि तोकिएको एन्फाले जनाएको छ । मनाङका किट्स म्यानेजर शिव लामालाई लिगको बाँकी सबै खेलमा निलम्बन गरिएको छ भने १० हजार रुपैयाँ जरिवाना पनि तोकिएको छ ।
टिमको बेञ्चलाई अनुशासनमा राख्न नसकेकामा दुबै टिमलाई ५० हजार जरिवाना समेत तोकिएको छ ।
ए डिभिजन लिगमा सोमबार भएको खेलमा दुई क्लबले २–२ गोलको बराबरी खेलेका थिए । तर खेल लगतै दुबै टिमका खेलाडीहरुले झगडा गरेका थिए ।
