२०७६ फागुन ७ गते ७:३९ 
७ फागुन, काठमाडौं । टिनएज स्टरा एर्लिन हालान्डले दुई गोल गरेपछि बोरुसिया डर्टमण्डले युरोपियन च्याम्पियन्स लिगअन्तर्गत अन्तसम्म १६ को पहिलो लेगमा पेरिस सेन्ट जर्मनले पिएसजीलाई २–१ ले पराजित गरेको छ । नेइमारले एक गोल गरे पनि पिसएजीलाई जिताउन भने सकेनन् ।
जर्मन क्लब डर्टमण्डको घरेलु मैदानमा भएको खेलमा तीन वटै गोल दोस्रो हाफमा ७ मिनेटको अन्तरमा भएको थियो । पहिलो हाफ गोलरहित बराबरी भएको खेलको ६९औं मिनेमा हालान्डले गोल गर्दै डर्टमण्डलाई अग्रता दिलाए । ७५औं मिनेटमा नेइमारले पिएसजीका लागि बराबरी गोल फर्काए । तर ७७औं मिनेटमा हालान्डले व्यक्तिगत दोस्रो गोल गरेपछि फेरि डर्टमण्डले अग्रता बनाउँदै खेल जित्यो ।
यसै जनवरी विन्डोमा अष्ट्रियन क्लब साल्जवर्गबाट डर्टमण्ड पुगेका हालान्डले गोलको वर्षा गरिरहेका छन् । च्याम्पियन लिगमा पनि उनले खेलेका सातवटै खेलमा गोल गर्ने क्रममा अहिलेसम्म १० गोल गरिसकेका छन् । यस सिजन उनले सबै खाले क्लब प्रतियोगितामा गरी २९ खेल खेल्दै ३९ गोल गरिसकेका छन् ।
उनी पिएसजीका किलियन एम्बाप्पेपछि च्याम्पियन्स लिगमा १० गोल पूरा गर्ने टिनएजर बने ।
प्रतिक्रिया 4