Comments Add Comment

भूकम्पले भत्काएको विद्यालयलाई सहयोग गर्न भृकुटी मण्डपमा नेपथ्य साँझ

१८ फागुन, काठमाडौं । प्रदर्शनीमार्ग भृकुटी मण्डपको बगैँचामा शनिबार नेपथ्य साँझ भव्यताका साथ सम्पन्न भएको छ ।

कार्यक्रमको सुरुआत ब्याण्डकै पहिलो रेकर्डेट ‘आँगनै भरि हिउँ नै झरे, आरु फूल है टिपि राखे है’ गीतबाट भएको थियो ।

नेपथ्यका स्थापनाकालीन सदस्यहरु र ब्याण्डकै प्रारम्भिक दिनहरुको झल्को तस्बिरहरुमा देखाउँदै प्रस्तुत भएको उक्त गीतसँगै मुख्य गायक तथा अगुवा अमृत गुरुङले एकपछि अर्को सर्वकालीक हिट गीतहरु सुनाए ।

अमृतले उनको परिचित शैलीमै पछिल्लो ‘है’लाई लेघ्रो तानेर चिच्याउँदा भृकुटी मण्डपको बगैँचामा उपस्थित हजारौं दर्शकले पनि उसैगरी उनलाई साथ दिएका थिए ।

कन्सर्टमा काठमाडौंका दर्शकहरुलाई अमृतले पहिलोपटक ब्याण्डको ‘नैना ताल’ गीत सुनाएका थिए । छमछमी नाच्ने भाकामा तयार भएको यो गीत सुनाएपछि अमृत केहिबेर मुलुकको परिस्थितिलाई लिएर राजधानीका दर्शकहरुसँग कुरा गरे ।

‘हाम्रा अगुवाहरुलाई धेरै गरेँ झैँ लाग्छ होला तर देशको हालत सबैतिर लथालिंग देखिन्छ है,’ फुर्सदको समय प्रायः मुलुकका विभिन्न भाग पैदलै डुलिहिँड्ने उनले थपे, ‘हामी सबैले गाउँ, सहर, टोलका नेतृत्व वर्गलाई सच्चिने सुझाव दिउँ है । नसच्चिए समय र सचेत जनताले कसैलाई पनि छुट दिनेछैन । सबै मिलेर जिम्मेवारहरुलाई सच्चिनुहोस् भनम् ह…ई’

त्यसपछि फेरि ब्याण्डका नयाँ पुराना गीतहरुको श्रृंखला चलेको थियो । सँधै झैँ यसपाला पनि ‘छेक्यो छेक्यो’, ‘रेश्शम’, ‘भेँडाको ऊनजस्तो’, ‘जोमसोमे बजार’, ‘उडायो रेलै ले’ हुँदै पछिल्लो समय जताततै बज्दै आएको ‘तालको पानी’सम्म गाएर सुनाइएको थियो ।

कार्यक्रममा अमृतले पैदल यात्राका क्रममा फेलापरेका तथा तयार पारिएका कतिपय गीत पनि गाएर सुनाएका थिए । त्यसैबेला उनले दर्शकहरुलाई नेपाल घुम्ने सुझाव पनि दिए ।

भूकम्पले भत्किएपछि अहिलेसम्मै निर्माणाधीन अवस्थामा रहेको दोलखाको भीमेश्वर नगरपालिका-२ स्थित राजकुलेश्वर निम्न माध्यमिक विद्यालयको सहयोगार्थ ‘हेल्प नेपाल नेटवर्क’सँग मिलेर यो कन्सर्ट आयोजना गरिएको हो । उद्देश्य अनुसारै कन्सर्टलाई ‘शिक्षाको लागि संगीत’ नाम दिइएको थियो ।

२०७२ सालको विनाशकारी महाभूकम्पका बेला नेपथ्य ब्याण्डले प्रधानमन्त्री राहतकोषमा दुईपटक गरेर दश लाख रुपैयाँ र विदेशका केही हकन्सर्टहरुबाट उठेको रकमसमेत उतैबाट समर्पित गरेर झण्डै चालिस लाख रुपैयाँको योगदान दिएको थियो ।त्यसैको निरन्तरता यो कन्सर्ट पनि भएको जानकारी ब्याण्डको व्यवस्थापन गर्दैआएका किरणकृष्ण श्रेष्ठले दिएका छन् ।

ब्याण्डले भूकम्पलगत्तै अष्ट्रेलियाको मेलबर्न, जापानको टोकियो र संयुक्त अरब इमिरेट्सको दुबईमा आयोजित कन्सर्टबाट उठेको रकमलाई भूकम्प पीडितहरुकै सहयोगार्थ समर्पित गरेको थियो ।

‘यो कन्सर्टबाट उठेको रकमले अब दोलखाका स साना स्कुले नानीहरुले पढ्ने ठाउँमा छानो पाउने भएका छन्,’ हेल्प नेपाल नेटवर्कका निर्देशक रोशेन्द्रध्वज खड्काले भने, ‘संगीतलाई यसरी लोक कल्याणकारी कार्यसँग जोड्न पाएकोमा असाध्यै खुशी लागेको छ ।’

दोलखाको त्यस सरकारी स्कुल पुनःनिर्माण कार्यको २०७३ चैत १५ गते नै औपचारिक उद्घाटन भएता पनि यो अझै निर्माणाधीन अवस्थामा छ । स्वीकृति प्राप्त डिजाइन मुताबिक यो स्कुल भवन बनेपछि यसबाट तीनसय जना विद्यार्थीले भूकम्प प्रतिरोधी भवनमा पढ्ने अवसर पाउने छन् । आधारभूत सुविधाहरुले युक्त यो भवन परम्परागत नेपाली ढाँचामा बन्दैछ ।

‘नेपथ्यले आफूलाई मनोरन्जनमा मात्र सीमित नराखेर सामाजिक दायित्वका क्षेत्रमा पनि धेरै अघिदेखि अग्रस्थानमा उभ्याउँदै आएको छ,’ ब्याण्डका मुख्य गायक एवं अगुवा अमृत गुरुङले भने, ‘दोलखाका स-साना नानीहरुमा समर्पित यो कन्सर्टले त्यसै उद्देश्यलाई निरन्तरता दिएको हो ।’

मञ्चमा अमृतलाई सँधैझै ड्रमसेटमा ध्रुव लामा, किबोर्डमा सुरज थापा, बेस गितारमा सुविन शाक्य, गितारमा निरज गुरुङ र मादलमा शान्ति रायमाझीले सघाएका थिए ।

तस्वीर : आर्यन धिमाल

यो खबर पढेर तपाईलाई कस्तो महसुस भयो ?

ट्रेन्डिङ

Advertisment