२ जेठ, बुटवल । मानव अधिकार तथा शान्ति समाज नेपालले कोरोना संक्रमितको उपचारमा प्रयोग गर्ने औषधिको आधिकारिक प्रोटोकल तयार गर्न सरकारलाई आग्रह गरेको छ ।
अन्य राष्ट्रहरूमा झै कोभिड १९ का संक्रमित बिरामीहरुको उपचारमा प्रयोग गर्ने औषधिको आधिकारिक प्रोटोकल तयार गर्नुपर्ने र यसो भएमा बिरामीको मृत्यु र डाक्टरको जोखिम कम हुने समाजका केन्द्रीय वरिष्ठ उपसभापति गोविन्द खनालले बताए ।
शान्ति समाजले चिकित्सक तथा स्वास्थ्यकर्मीहरुको सुरक्षा र संरक्षणका लागि पर्याप्त बीमा, भइपरी आउँदा उल्लेख्य सहयोग व्यवस्था गर्नुपर्ने, कोभिड १९ संक्रमण रोकथा र नियन्त्रणका लागि सरकार, राजनीतिक समाज र नागरिक समाजबीच सहकार्यको प्रभावकारी बनाउन पनि आग्रह गरेको छ ।
समाजले एक विज्ञप्ति जारी गर्दै लकडाउनको अवधिलाई सहजीकरण गर्ने उपायसहित सबै तहका सरकार र निकायले राहत सहितको सेवामुखी योजना अवलम्बन गर्नुपर्ने बताएको छ ।
