८ वैशाख, जनकपुरधाम । र्यापिड (आरडीटी) टेस्टमा पोजेटिभ देखिएका धनुषाको वडा अध्यक्षको स्वाब परीक्षण नेगेटिभ आएको छ । भारतबाट एक महिनापछि फर्केका धनुषाका एक जना वडा अध्यक्षको र्यापिड (आरडीटी) टेस्ट सोमबार पोजेटिभ देखिएको थियो ।
धनुषाको जनकनन्दनी गाउँपालिका वडा नम्बर २ का अध्यक्षको आरडिटी टेस्ट पोजेटिभ देखिएपछि उनलाई प्रादेशिक अस्पताल जनकपुरधाम ल्याएर पिसिआर प्रविधी मार्फत् परीक्षण गर्दा नेगेटिभ आएको प्रदेश स्वास्थ्य निर्देशनालयका सह निर्देशक विजय झाले जानकारी दिए ।
उनी एक महिनापछि गत चैत २२ गते साँझ भारतबाट आएका थिए । कोरोना संक्रमण फैलिन नदिन लकडाउन लगाएको अवस्थामा उनी लुकेर घर आएको स्थानीयहरुले बताएपछि चैत २४ गते उनलाई वडा नम्बर ४ स्थित माध्यमिक विद्यालयको क्वारेन्टाइनमा राखिएको थियो ।
१४ दिन क्वारेन्टाइनमा राखिएपछि सोमबार उनको आरडीटी जाँच गर्दा पोजेटिभ देखिएको थियो ।
क्वारेन्टाइनमा राखिएका नौ जनाको जाँच गर्दा ८ जनाको नेगेटिभ देखिएको र वडा अध्यक्षकै पोजेटिभ देखिएपछि उनको स्वाब परीक्षणका लागि जनकपुरधाम ल्याइएको थियो ।