Comments Add Comment

यस्तो छ इरफान खानको जीवनकथा

मृत्युको मुखमा पुगेपछि के भनेका थिए इरफानले ?

‘मेरो दिमाग अक्सर मलाई भन्छ – ‘मलाई यो बिमार छ र म केही महिना वा एक/दुई वर्षपछि मर्नेछु ।’ म आफ्नो दिमागले भनेको कुरा पूरा खारेज गरेर त्यसतर्फ मोडिन सक्छु, जसमा मलाई जिन्दगीले जिउनका लागि बाटो खुला गरिदिएको छ । मलाई जिन्दगीले धेरै मौका दिइरहेको छ । मलाई थाहा छ कि चौतर्फी अन्धकारले घेरिएको बाटोमा म हिँड्दैछु । मैले देखेको छैन कि मलाई जिन्दगीले के दिइरहेको छ ?’

‘तपाईं सोच्न छाड्नुहोस्, योजना बनाउन छाड्नुहोस् । तब तपाईंले जिन्दगीको अर्को रुप अनुभूत गर्न पाउनुहुनेछ । यही कारण मलाई लाग्छ, मसँग अर्को कुनै शब्द छैन, सिवाय ‘धन्यवाद ।’ कुनै अर्को शब्द छैन । कुनै माग छैन । कुनै दोस्रो अनुरोध पनि छैन ।’

आफूलाई निकै घातक एवं दुर्लभ क्यान्सर भएको थाहा भएपछि भारतीय अभिनेता इरफान खानले लन्डनको एक अस्पतालबाट एसोसिएटेड प्रेससँग कुराकानी गर्दै यसै भनेका थिए । क्यान्सरको उपचारपछि उनी आफ्नो लयमा फर्कने सुरसार गरिरहँदा सर्वत्र खबर फैलियो – ‘इरफानको निधन भयो।’

व्यक्तिगत जीवन

इरफान खान बलिउडका उम्दा अभिनेता हुन् । उनले बलिउडमा जुन उचाइ लिएका छन्, त्यो आफैँमा लोभलाग्दो छ । बलिउड हुँदै हलिउडमा समेत ख्याती कमाएका उनी सन् १९६७ जनवरी ७ मा भारतको जयपुर, राजस्थानमा जन्मिएका थिए।

इरफानका पिता साहबजादा यासिन अली खान उद्यमी थिए । आमा गृहणी थिइन्। उनका दुई भाइ छन्, सलमान खान र इमरान खान। रुखसाना बेगम नामकी एक बहिनी छिन् ।

उनले राष्ट्रिय नाट्य विश्वविद्यालयबाट प्रशिक्षण लिएका थिए । सन् १९९५ मा इरफानले सुतपा सिकदरसँग विवाह गरे । सुतपा पनि राष्ट्रिय नाट्य विद्यालयमै आवद्ध थिइन् । उनीहरूको कोखबाट दुई छोराहरू जन्मिए, अयान खान र बबिल खान ।

कार्टुन बनाउँथे

करियरको पूवार्धमा इरफान खान कार्टुन बनाउँथे । स्थानीय अखबार दैनिक भास्कर र स्वदेशमा उनले कार्टुन बनाए ।

दिल्लीको श्रीधरणी आर्ट ग्यालरीमा आफ्नो चित्र प्रदर्शन गर्ने क्रममा उनी नवभारत टाइम्समा जोडिए । त्यसपछि उनी अरू थुप्रै मूलधारका पत्रिकामा कार्टुन बनाउन थाले ।

वरिष्ठ कार्टुनिस्टको चिनारी बनाइरहेकै बेला उनले एनडिटिभीमा आफ्नो ‘टक सो’ होस्ट गरे। यो सन् २००३ को कुरा हो ।

यो पनि पढ्नुहोस इरफान खानको अन्तिम यात्रामा २० जना मात्र जाने

पछि एसियाई कार्टुन प्रदर्शनीमा पनि उनी भारतको प्रतिनिधित्व गर्दै विभिन्न मुलुकमा कार्टुन देखाउन पुगेका थिए ।

त्यसबेला उनी करियरको सुरुवाती चरणमा थिए । उनी सडकमा थिए । दु:खपूर्ण जीवन थियो । ठिक त्यही बेला उनको जीवनमा एक युवती आइन्, सुतपा ।

तर, त्यसभन्दा अगाडि उनले अर्को दु:खको सामना गर्नुपर्‍यो, उनको बुबाको मृत्यु। त्यो मृत्युले घरको आयस्रोत सबै बन्द भयो । इरफानलाई घरबाट पैसा आउने बाटो बन्द भयो । यस्तै, दुखदायी क्षणमा उनले अभिनय सिके र  त्यसकै लागि निरन्तर डटिरहे । अन्तत: टेलिशृङ्खला हुँदै उनी फिल्मी दुनियाँमा छिरे ।

पहिलो फिल्म

इरफानले ‘सलाम बम्बे’ फिल्मबाट अभिनय यात्रा सुरु गरेका हुन्, १९८८ मा ।  त्यसपछि उनी निरन्तर फिल्मी क्षेत्रमै तल्लिन रहे। यसबीचमा इरफानले हसिल, लाइफ इन ए..मेट्रो, पान सिंह तोमर, लन्च बक्स, जुरासिक वर्ल्ड, लाइफ अफ पाई जस्ता हलिउड, बलिउड फिल्ममा अभिनय गरे ।

इरफान खानसँग जोडिएको विवाद

इरफानले बकरा इदको विषयमा दिएको एक अभिव्यक्तिले विवादको रुप लिएको थियो । उनको अभिव्यक्तिलाई केही मुस्लिम संगठनले घोर विरोध जनाएका थिए । उनीहरूले भनेका थिए, ‘आफ्नो काममा ध्यान देऊ, धार्मिक रीति रिवाजमाथि बयान दिनु आवश्यक छैन ।’

त्यसको जवाफमा इरफानले ट्विट गर्दै भनेका थिए, ‘भगवान धन्यवाद ! म धार्मिक ठेकेदारद्वारा सञ्चालित देशमा बसेको छैन ।’

इरफान खानसँग जोडिएको रोचक कुरा

क्रिकेटर बन्न चाहन्थे

इरफान खान त्यसताका अभिनेता बन्ने सोचमा पुगेकै थिएनन् । खासमा उनी क्रिकेटर बन्न चाहन्थे । तर, उनको भाग्यमा अर्कै लेखिएको रहेछ । उनी क्रिकेटर बनेनन्, अभिनेता बने ।

आफ्नो नाममा ‘आर’

इरफान खान अंग्रेजीमा आफ्नो नाममा दुई वटा आर राखे, आइआरआरएफएएन । अर्थात् इरफान । कतिले भन्छन् कि, अंकज्योतिषको कारण इरफानले आफ्नो नाममा एक अर्को आर जोडेका हुन् । तर, इरफानलाई त्यसको साउन्ड राम्रो लागेकाले आर जोडिएको बताएका थिए ।

खान नामले हैरानी

इरफान खानले आफ्नो नामको पछाडि जोडिन आउने खानको कारण यदाकदा दु:ख झेलेका छन् । अमेरिकी विमानस्थलमा उनलाई कति पटक रोकेर सोधपुछ गरिएको थियो ।

ओस्कार विजेता फिल्ममा काम

इरफानले ‘स्लमडग मिलियनेयर र लाइफ अफ पाई’ फिल्ममा काम गरे । यी दुवै फिल्मले केही विधामा ओस्कार अवार्ड जितेको थियो ।

इरफानको सम्पति

इरफानले एउटा फिल्ममा अभिनय गरेबापत भारु १२ देखि १४ करोड रुपैयाँसम्म पारिश्रमिक लिने गरेका थिए । उनको मुम्बईमा एक फ्ल्याट छ, जसमा उनी आफ्ना परिवारसँग बस्थे । त्यस फ्ल्याइटको मूल्य भारु करिब तीन करोड हो । इरफानसँग चारवटा गाडी थियो । उनीसँग करिब भारु ८० करोड बराबरको सम्पत्ति भएको बताइन्छ ।

यो खबर पढेर तपाईलाई कस्तो महसुस भयो ?

ट्रेन्डिङ

Advertisment