२०७७ जेठ १९ गते ७:२२ 
१९ जेठ, काठमाडौं । बार्सिलोना र अर्जेन्टिनाका कप्तान लिओनल मेसीले फुटबल अब उस्तै नहुने बताएका छन् । कोभिड १९ को कारणले धेरैले आफ्ना नजिकका साथी गुमाएकोमा दु:खी हुँदै मेसीले यसको असर आगामी वर्षमा पर्ने विचार व्यक्त गरे । कोरोनाभाइरस महामारीले गर्दा फुटबल जीवन अब फेरि उस्तै नहुने मेसीको धारणा छ ।
‘हामीमध्ये धेरै जना अहिले शंकामा छौँ कि यो घटनापछि अबको विश्व कस्तो हुनेछ । एकान्तवास र हामीलाई आश्चर्यमा पार्ने यस अवस्था बाहेक धेरै मानिसले कठिन समयको सामना गर्नुपर्यो किनकी यस परिस्थितिले कुनै न कुनै रुपमा उनीहरुलाई असर गर्यो । धेरैले परिवार साथी गुमाए, कतिले हेर्न समेत पाएनन्,’ मेसीले एल पाइससँग भने, ‘यस संकटमा मेरो विचारमा धेरै नकारात्मक विषयहरु भए तर त्यहाँ तपाईँको प्रिय व्यक्ति गुमाउनुभन्दा खराब कुरा अरु केही हुँदैन । त्यसैले मलाई धेरै निराश बनाएको छ र मेरोलागि यो सबैभन्दा अन्यायपूर्ण विषय बनेको छ ।’
उनले थपे, ‘सामान्य जीवन जस्तै फुटबल पनि मेरो विचारमा कहिल्यै उस्तै हुने छैन ।’
कोभिड१९ को कारण विश्वमा हजारौँ मानिसले ज्यान गुमाएका छन् । धेरै देशमा सामूहिक भेला हुन बन्द गरियो जसले गर्दा केही हप्ता भाइरससंग जुध्नकै लागि फुटबल पनि बन्द गरियो । यही समयमा सुरक्षाको उपायहरु अपनाउ ला लिगा जुन ११ देखि फेरी शुरु हुँदैछ ।
मेसीको कप्तानीमा रहेको बार्सिलोनाले रियल मड्रिडलाई अंक तालिकामा २ अंकले पछि पारेको छ र फेरि फुटबल शुरु हुँदा उक्त अग्रता कायम राख्न चाहन्छ ।
प्रतिक्रिया 4