कर्मचारी तथा कामदारले आफूले काम गरेबापत तलब माग्नु स्वभाविकै हो । तर भारतमा चाहिँ आफ्नो पाकिसकेको तलब माग्नु एक युवकका लागि अभिषाप बनेको छ ।
रेष्टुरेन्टमा काम गर्ने ती युवकमाथि तलब मागेको भन्दै रेष्टुरेन्ट मालिकले आफ्नै घरको कुकुरलाई आक्रमण गर्न लगाएका छन् ।
रेष्टुरेन्ट मालिकको कुकुरको टोकाइबाट कल्याण सिंह नामका ती मजदुर युवक घाइते भएका छन् ।
घटना भारतको जोधपुरमा भएको हो । आफुले अघिल्लो महिनाको तलब माग गर्दा मालिकले रेष्टुरेन्टमा पालेको कुकुरलाई बोलाएर आफुलाई टोक्न लगाएको भन्दै ती युवकले महामन्दिर पुलिस चौकीमा उजुरी दर्ता गराएका छन् ।
रेष्टुरेन्ट मालिकमाथि कारबाही गर्न र आफ्नो पाकेको तलब दिलाइदिन पनि उनले माग गरेका छन् ।
प्रहरीले उक्त घटनाको छानबिन सुरु गरेको बताएको छ ।
एजेन्सी
