२१ साउन, काठमाडौं । दक्षिण पूर्वी एसियाली देश फिलिपिन्समा पछिल्लो केही दिनयता निरन्तर कोरोना भाइरस (कोभिड–१९) को संक्रमण बढ्दो क्रममा देखिएको छ ।
बढ्दो संक्रमणलाई ध्यानमा राख्दै सरकारले राजधानी मनिला र संक्रमणको असर देखिएका केही क्षेत्रमा पुनः लकडाउनको घोषणा गरिसकेको छ । यसअघिको लकडाउन गत जुन महिनाबाट विस्तारै खुकुलो पारिएको थियो ।
यद्यपि पुनः लकडाउन शुरु भएको पहिलो दिन मंगलबार फिलिपिन्सले सार्वजनिक गरेको तथ्यांकअनुसार पछिल्लो २४ घण्टामा ६ हजार ३५२ नयाँ संक्रमित भेटिएका थिए ।
यो संख्या फिलिपिन्सको लागि एकैदिन भेटिएका अहिलेसम्मकै धेरै संक्रमित हुन् । बुधबार पनि फिलिपिन्समा तीन हजार ४६२ नयाँ संक्रमित भेटिएका छन् ।
यससँगै मुलुकको समग्र संक्रमितको संख्या एक लाख १५ हजार ९८० पुगेको छ । समग्र संक्रमितको संख्याको आधारमा फिलिपिन्स दक्षिणपूर्वी एसियामा इन्डोनेसियापछि सबैभन्दा बढी प्रभावित मुलुक हो ।
इन्डोनेसियामा कोरोना भाइरसका संक्रमितको संख्या एक लाख १६ हजार ८७१ पुगेको छ ।
फिलिपिन्समा कोरोना भाइरसको कारण मृत्यु हुनेको संख्या दुई हजार १२३ पुगेको छ । पछिल्लो २४ घण्टामा मात्र नौ जनाको मृत्यु भएको थियो ।
स्रोत : अलजाजिरा
