३० भदौ, हेटौंडा । मकवानपुरको हेटौंडा उपमहानगरपालिका क्षेत्रमा ३१ किलोमिटर सडकमा स्लाब ढलान गरिएको छ । उपमहानगरपालिकाका अनुसार आर्थिक वर्ष २०७६/७७ मा १९ वटै वडामा ३१ किलोमिटर सडक स्लाब ढलान भएको हो ।
कालोपत्रे भन्दा बढी टिकाउ हुने विश्वासका साथ उपमहानगरले कच्ची रहेका सडकलाई पक्की बनाउने अभियान अनुसार ३१ किलोमिटर सडकमा स्लाब ढलान र बजार क्षेत्रमा एक किलोमिटर सडकलाई कालोपत्रे गरिएको मेयर हरिबहादुर महतले जानकारी दिए ।
उपमहानगरपालिका क्षेत्रका कच्ची सडकलाई पक्की निर्माणका लागि बिशेष प्राथमिकतामा राखेर काम अघि बढाएको महतले बताए ।
स्थानीय उपभोक्ताको जनसहभागितामा एक वर्षयता स्लाब ढलानमा मात्र कुल ४० करोड ९५ लाख २ हजार रुपैयाँ र सडक कालोपत्रेका लागि स्थानीय उपभोक्ताको जनसहभागिता समेत गरेर ८ करोड ५६ लाख २ हजार रुपैयाँ खर्च गरेको मेयर महतले बताए । हेटौंडाका धेरै सडकमा पानी जम्ने र कालोपत्रे सडक छिटो उप्किने भएकाले सडकमा स्लाब ढलानको कामलाई बढी प्राथमिकता दिइएको मेयर महतको भनाइ छ ।
