१४ फागुन, काठमाडौं । वरिष्ठ पत्रकार होमनाथ दाहाल महेन्द्रनारायण निधि राष्ट्रिय पुरस्कार २०७६ बाट सम्मानित भएका छन् । राष्ट्रपति विद्यादेवी भण्डारीले वरिष्ठ पत्रकार होमनाथ दाहाललाई सितल निवासमा महेन्द्रनारायण निधि स्मृति प्रतिष्ठानले आयोजना गरेको कार्यक्रममा सम्मान गरेकी हुन् ।
यस्तै डा. रामदयाल राकेश पनि महेन्द्रनारायण निधि राष्ट्रिय पुरस्कारबाट सम्मानित भएका छन् । सम्मानित हुने परिष्ठ पत्रकार दाहालले २०२१ सालबाट पत्रकारिता सुरु गरेका थिए । दाहालले अभिव्यक्ति स्वतन्त्रता र प्रेस स्वतन्त्रता सहित लोकतन्त्र बहालीका आन्दोलनमा पटकपटक जेल यातना समेत भोगेका छन् ।
दाहाल नेपाल पत्रकार महासंघको सभापति, गोरखापत्र संस्थानको अध्यक्ष तथा महाप्रवन्धक समेत भइसकेका छन् । २०५६ मा ओखलढुंगाबाट प्रतिनिधि सभाको सांसदमा समेत विजयी भएका थिए ।
यस्तै सम्मानित अर्का व्यक्ति डा. रामदयाल राकेश नेपालको लोकसंस्कृतिको विषयमा पोष्ट डक्टरल रिसर्च उपाधि पाउने पहिलो व्यक्ति हुन् । नेपाली लोक संस्कृति, मिथिला संस्कृति, र हिन्दी साहित्यमा डा. राकेशका दर्जनौं कृति प्रकाशित भएका छन् ।
प्रतिष्ठानले प्रेमसागरी देवी निधि पुरस्कार २०७६ बाट काशीदेवी झा र गिरिराजकुमारी (ज्ञानु) प्रसाईंलाई सम्मान गरेको छ । सम्मानित हुने काशीदेवी झा सहिद दुर्गानन्द झा की पत्नी हुन् । स्वर्गीय दुर्गानन्द झाले २०१८ साल माघ ९ गते जनकपुर भ्रमणमा गएका राजा महेन्द्रमाथि बम प्रहार गरेका थिए ।
त्यस्तै सम्मानित हुने गिरिराजकुमारी (ज्ञानु) प्रसाईं समाजवादी नेता चिन्तक सिके प्रसाईं की पत्नी हुन् । नेपालमा लोकतान्त्रिक समाजवादका भाष्यकार विश्वेश्वर प्रसाद कोइरालाको अर्को रुपका रुपमा सिके प्रसाईलाई लिने गरिन्छ ।
सिके प्रसाईंको बौद्धिक सहयोगीको रुपमा सम्मानित हुने ज्ञानु प्रसाईंलाई लिने गरिन्छ । सम्मानित ज्ञानु प्रसाईंले सिके प्रसाईं चिन्तन प्रतिष्ठान स्थापना गरी नेपालमा लोकतान्त्रिक समाजवादको विचार आन्दोलनमा क्रियाशील रहँदै आएका छन् ।
