२४ चैत, काठमाडौं । अष्ट्रेलिया र न्युजिल्याण्डले एकअर्काका नागरिकलाई क्वारेन्टिनमा बस्न नपर्ने गरी सीमा खोल्ने निर्णय गरेका छन् । न्युजिल्याण्डकी प्रधानमन्त्री ज्यासिन्डा अर्डनले मंगलबार उक्त निर्णय सार्वजनिक गरेकी हुन् । यो निर्णय अप्रिल १९ देखि कार्यान्वयनमा आउनेछ ।
गत अक्टोबरयता न्युजिल्याण्डका पर्यटकहरुलाई अष्ट्रेलियाका सबैजसो राज्यमा क्वारेन्टिन विना नै प्रवेशको अनुमति दिइएको छ तर न्युजिल्याण्डले क्वारेन्टिन अनिवार्य गर्दै आएको छ । यी दुवै मुलुकमा कोरोना संक्रमण अहिले शून्यको हाराहारीमा झरेको छ ।
गत वर्षको मार्च महिनामा अष्ट्रेलिया र न्युजिल्याण्डले आफ्नो अन्तर्राष्ट्रिय सीमा बन्द गर्ने निर्णय गरेका थिए । उनीहरुले विदेशी आगन्तुकलाई अनिवार्य क्वारेन्टिनको नियम लगाएका छन् ।
न्युजिल्याण्डकी प्रधानमन्त्री अर्डनले कोरोना संक्रमण नियन्त्रणको लागि आवश्यक मापदण्ड पालना गर्दै कोरोनामुक्त बनेको अन्य मुलुक विश्वमा नभएको भन्दै यो मामिलामा विश्वका अन्य मुलुकलाई आफूहरुले नेतृत्व गरिरहेको बताइन् ।
कोरोना महामारी सुरु हुनुभन्दा पहिला वाषिर्क १५ लाख अष्ट्रेलियाली नागरिकले न्युजिल्याण्ड भ्रमण गर्ने गरेका थिए । यो संख्या न्युजिल्याण्ड भ्रमण गर्ने समग्र पर्यटकको करिब ४० प्रतिशत हो ।
एजेन्सीहरुको सहयोगमा
