१६ जेठ, काठमाडौं । आइतबार देशभरमा जम्मा ४ हजार ३६९ जना नयाँ संक्रमित थपिएका छन् । कोरोना महामारीको दोस्रो लहरकै सबैभन्दा धेरै ९४८३ संक्रमित वैशाख २८ गते एकै दिन थपिएको थियो भने जेठको दोस्रो साता औषतमा दैनिक ८ हजार संक्रमित भेटिएका थिए ।

तर तेस्रो साताको पहिलो दिन अर्थात १५ गते ४४८७ जनामा संक्रमण पुष्टि भयो भने १६ गते अर्थात आज अझ घटेर ४३६९ मा आइपुगेको स्वास्थ्य तथा जनसंख्या मन्त्रालयले जनाएको छ ।

यो तथ्यांक हेर्दा एक महिनादेखि निषेधाज्ञा झलिसकेका आम नागरिकलाई कोभिड-१९ को संक्रमण नियन्त्रणउन्मुख लाग्नु स्वभाविक हो । तर दैनिक परीक्षणलाई हेर्ने हो भने पछिल्ला दुई दिनमा दैनिक पहिचान हुने संक्रमितको संख्या आएको गिरावट स्वभाविक देखिन्न ।

मन्त्रालयको तथ्यांकअनुुसार अघिल्लो सातासम्म २० हजार हाराहारी रहेको परीक्षण शनिबार घटेर १४ हजार ७५२ मा आइपुगेको छ । आइतबार त देशभरमा १२ हजार ७७० नमुना मात्र परीक्षण भएको पाइएको छ ।

परीक्षण आधा नै घट्दा पनि संक्रमण दर भने उस्तै छ । जेठ १४ गते २० हजार ११० नमुना परीक्षण गर्दा ६ हजार ९५१ मा संक्रमण पुष्टि भयो । संक्रमण दर ३४.५६ प्रतिशत छ । १६ गते आइतबार कोरोना परीक्षण घटेर १२ हजार ७७० मा झरेको छ भने ४३६९ मा संक्रमण देखिएको छ । संक्रमण दर भने ३४.२३ प्रतिशत देखिएको छ ।

कहाँ घट्यो परीक्षण ?

काठमाडौं उपत्यकामा १६ वैशाखदेखि जारी निषेधाज्ञालाई यही शुक्रबारबाट निकै कडा पारिएको छ । शनिबारबाट एकाएक परीक्षण घटेको छ ।

घट्दो परीक्षणको ठूलो हिस्सा बाग्मती प्रदेशकै छ । मन्त्रालयको तथ्यांकअनुसार जेठ १४ गते बाग्मती प्रदेशका सबै प्रयोगशालामा गरी ११ हजार ३३७ नमुनाको पीसीआर परीक्षण भएको थियो । १५ गते घटेर ७ हजार ९२ मा आइपुगेको छ भने १६ गते आइतबार ४७१५ नमुना मात्र परीक्षण भएको छ । संक्रमण दर भने ३५ प्रतिशत भन्दामाथि नै छ ।

गाउँगाउँमा एन्टिजेन पुगेका कारण प्रयोगशालासम्म आएर कोरोना परीक्षण गर्नेहरु कम भएको हुनसक्ने स्वास्थ्य मन्त्रालयका सहप्रवक्ता डा. समीर अधिकारीले बताउँछन् । ‘एन्टिजेन स्थानीय तहहरुमा पठाएका छौं । गाउँमै परीक्षण हुने भएपछि त्यसको पर्खाइमा बसेको हुन सक्छ’ उनले भने, ‘अन्य कारणहरु भए अध्ययनपछि मात्रै भन्न सकिन्छ ।’

तर जुन अनुपातमा पीसीआर टेष्ट घटेकोछ, त्यसअनुसार एन्टिजेन टेष्ट बढेको छैन । मन्त्रालयको तथ्यांकअनुसार १४ जेठमा ७९७ र १५ गते ७४६ जनाको एन्टिजेन परीक्षण भएको थियो । आइतबार १६ गते भने एन्टिजेन परीक्षण गराउनेको संख्या बढेर १७८४ जना पुगेको छ । इपिडिमियोलोजी तथा रोग नियन्त्रण महाशाखाका प्रमुख डा. कृष्ण पौडेलले भने एन्टिजेन परीक्षण केही दिनपछि अझ बढ्ने उनले बताए ।

राष्ट्रिय जनस्वास्थ्य प्रयोगशालाकी प्रमुख डा. लुना झा भने समुदायमा संक्रमण कम हुँदै गएका कारण परीक्षण कम हुन गएको हुनसक्ने बताउँछिन् । उनका अनुसार दोस्रो लहरमा संक्रमण उच्च हुँदा संक्रमण दर ४४.४९ प्रतिशत थियो । ‘संक्रमण दर उच्च हुँदा एकैपटक परीक्षण गर्ने संख्या ठूलो थियो,’ उनले भनिन्, ‘पछिल्लो समय संक्रमण दर घटेसँगै परीक्षण पनि १२ हजारको हाराहारीमा आएको छ ।’

शुक्रराज ट्रपिकल तथा सरुवा रोग अस्पताल, टेकुका डा. अपुन बास्तोला पनि दुई साता अघिको तुलनामा सिकिस्त भएर आउने विरामीको संख्या केही कम भएको बताउँछन् । तर अझै पनि समुदायमा संक्रमण भएकाले परीक्षण गरेर संक्रमितको पहिचान गर्नुपर्ने बताउँछन् ।