नेपाल ओलम्पिक कमिटी र केल्मीबीच सम्झौता

११ असार, काठमाडौं । नेपाल ओलम्पिक कमिटी (एनओसी) र केल्मीबीच शुक्रबार प्रायोजनको सम्झौता भएको छ ।

एनओसी अध्यक्ष जीवनराम श्रेष्ठ र केल्मीको आधिकारिक विक्रेता कामरु ट्रेडिङका निर्देशक प्रदीप न्यौपानले सम्झौतामा हस्ताक्षर गरेका छन् ।

सम्झौता अनुसार नेपालमा केल्मीको आधिकारिक विक्रेता कामरुले टोकियो ओलम्पिक २०२० मा सहभागी हुने नेपाली खेलाडी, प्रशिक्षक र पदाधिकारीलाई सबै पोशाक प्रायोजन गर्नेछ ।

उक्त अवसरमा एनओसी अध्यक्ष श्रेष्ठले नेपाली खेलकुद र नीजि क्षेत्रबीच सहकार्य र साझेदारी आवश्यक रहेकोमा जोड दिँदै कामरुसँगको अनुबन्ध भविष्यमा दीर्घकालीन हुने विश्वास व्यक्त गरे ।

यस्तै कमिटीका उपाध्यक्ष तथा कार्यकारी निर्देशक चतुरानन्दराज वैद्यले कामरुसँगको अनुबन्ध सुरुवात मात्र रहेको बताए । यस्तै कामरुका निर्देशक न्यौपानेले टोकियो ओलम्पिकमा सहभागी हुने टोलीको पोसाक प्रायोजन गर्न पाएकोमा खुसी भएको बताए ।

यसैगरी कमिटीका सदस्य तथा मार्केटिङ एन्ड स्पोनसर कमिटीका संयोजक गोपाल कक्षपतिले नेपाली खेलकुदका विकासका लागि यस प्रकारको प्रायोजन बढाउनु पर्नेमा जोड दिए ।