३१ असार, बुटवल । रुपन्देहीमा सार्वजनिक तथा निजी सवारी साधनमा लगाइएको जोर–विजोर प्रणाली हटाइएको छ । जिल्ला प्रशासन कार्यालयले बिहीबार साउन १५ गतेसम्म निषेधाज्ञाको आदेश जारी गर्दा जोर विजोर प्रणाली हटाएको हो ।
निषेधाज्ञा अवधिमा सभा, सम्मेलन र भीडभाड हुने गतिविधि मात्र गर्न नपाइने वैठकले निर्णय गरेको सहायक प्रमुख जिल्ला अधिकारी कमलराज पाण्डेले बताए । यस्तै विश्वविद्यालय तथा विद्यालय तहका परीक्षा एउटा कक्षामा २५ जना भन्दा धेरै राख्न नपाउने गरी सञ्चालन गर्न अनुमति दिने निर्णय गरिएको उनले जानकारी दिए ।
‘निषेधाज्ञालाई थप खुकुलो पार्दै सबै खाले व्यवसाय सञ्चालन गर्न दिने र स्वास्थ्यका मापदण्ड पालनामा कडाइ गरी कोरोना परीक्षणको दायरा बढाउने निर्णय गरिएको छ’ पाण्डेले भने, ‘कोरोना जोखिम हटिसकेको छैन, कसैले पनि निषेधाज्ञा खुकुलो भयो भनेर लापरवाही नगरौं ।’
