किन छाडे वाट्मोरले नेपाली क्रिकेट टिम ?

२०७८ भदौ १५ गते २२:०६

१५ भदौ, काठमाडौं । राष्ट्रिय क्रिकेट टिमको मुख्य प्रशिक्षक नियुक्त गर्दै नेपाल क्रिकेट संघ (क्यान)ले डेभ वाट्मोरलाई दिएको लक्ष्य हो, क्रिकेट वर्ल्डकप लिग–२ मा राम्रो प्रदर्शन गर्ने र एकदिवसीय राष्ट्रको मान्यता कायमै राख्ने ।

तर आफ्नो प्रशिक्षकत्वमा नेपालले लिग–२ मा पहिलो त्रिकोणात्मक सिरिज खेल्नुअघि उनले राजीनामा दिएका छन् । नेपाल, ओमान र अमेरिकाको त्रिकोणात्मक सिरिजका लागि ओमान पुगेका उनले त्यहीँबाट राजीनामा दिएका हुन् ।

उनले १३–२० सेप्टेम्बरसम्म हुने सिरिजपछि लागू हुने गरी राजीनामा बुझएका हुन् । जबकी उनको सम्झौता अवधि २०२१ भर अर्थात थप तीन महिना थियो ।

श्रीलंकालाई विश्वकपको उपाधि दिलाएका हाइप्रोफाइल प्रशिक्षक वाट्मोरले किन दिए त राजीनामा ?

वाट्मोरसँग काम गरेकाहरु भन्छन्– उनी जे सोचेर नेपाल आएका थिए, त्यो उनले पटक्कै पाएनन् । अर्थात क्रिकेट संघको व्यवस्थापन निकै फितलो रह्यो ।

अन्तर्राष्ट्रिय क्रिकेट काउन्सिल (आईसीसी)को शर्तहरु पूरा गर्दै चतुरबहादुर चन्द नेतृत्वको नयाँ कार्यसमिति निर्वाचित भएपछि क्यानको निलम्बन असोज २०७७ मा फुकुवा भएको थियो । तर चन्द नेतृत्वको क्यान प्रभावकारी देखिएको छैन । बरु अनेक विवादमा फस्यो । अहिले पनि प्रशिक्षक वाट्मोरले सम्झौता अवधि बाँकी छँदै राजीनामा दिनुमा क्यान जिम्मेवार मानिन्छ ।

खासगरी व्यवस्थापनमा क्यान निकै कमजोर साबित भयो । उनी ब्याटिङ, बलिङ प्रशिक्षक, टेक्निकल एनालिस्टलगायतका जनशक्ति राखेर काम गर्दै आएका प्रशिक्षक हुन् । तर नेपालमा क्रिकेट संघले उनलाई त्यो सुविधा दिएको थिएन ।

पदाधिकारीपिच्छे फरक–फरक कुरा हुने, एकअर्कालाई देखाएर पन्छिने, समयमा सूचना आदान प्रदान नहुनेजस्ता क्यानको बेथितिप्रति पनि उनी असन्तुष्ट थिए ।

प्रशिक्षक नियुक्त गरेपछि वाट्मोरलाई समयमा तलब दिन नसक्नु पनि क्यानको अर्को कमजोरी रह्यो । श्रम सम्झौता नभएको भन्दै सुरुवाती दुई महिनाको तलब समयमा दिइएको थिएन । क्यानका पदाधिकारी पनि यो स्वीकार गर्छन् ।

वाट्मोर कतिपय खेलाडीको व्यवहारप्रति सन्तुष्ट थिएनन् । पटकपटक सम्झाउँदा पनि नटेरेको उनको गुनासो थियो । त्यही बेला पूर्व कप्तान पारस खड्काले अन्तर्राष्ट्रिय क्रिकेटबाट सन्यास लिएपछि सम्हाल्न गाह्रो हुन्छ भन्ने निष्कर्षमा पुगेको स्रोतको दाबी छ । स्रोत भन्छ, ‘नेपालमा जुन खालको संरचना छ, यो अस्तव्यस्ततामा बस्न सकिँदैन भन्ने लागेर छोड्नु भएको हो ।’

क्रिकेट संघका अध्यक्ष चन्द भने यसलाई स्वीकार गर्दैनन् । भन्छन्, ‘उहाँ क्यानसँग पूर्ण रुपमा सन्तुष्ट हुनुहुन्थ्यो । पैसा दिएकै थियौं, भनेको समय क्याप राखेकै छौं ।’

त्यसो भए वाट्मोरले किन छाडे त ? चन्द भन्छन्, ‘उनको प्राथमिकतामा नेपाल थिएन ।’

वाट्मोरको प्राथमिकतामा नेपाल थिएन

नेपाल आउनुअघि वाट्मोर बरोडा क्रिकेट एशोसिएसन, भारतमा आवद्ध हुने मुडमा थिए ।

कोभिड–१९ का कारण रणजी ट्रफी स्थगित भयो । त्यही कारण छोटो समयका लागि मात्र उनी नेपाल आएको क्यान अध्यक्ष चन्दको दाबी छ ।

भन्छन्, ‘उनको प्रथमिकतामा नेपाल थिएन । भारतमा जे गर्न खोजेका थिए, त्यो विभिन्न कारणले भएन । त्यसैले केही समयका लागि मात्र नेपाल आएका हुन् ।’

उनको दाबीलाई टाइम्स अफ इण्डियामा ८ मार्च २०२१ मा प्राकाशित समाचारले पनि पुष्टि गर्छ । बरोडा क्रिकेट एशोसिएसनका अध्यक्ष प्रणव अमिनले वाट्मोर प्रशिक्षकका रुपमा आउन लागेको जानकारी दिएको समाचारमा उल्लेख छ ।

यसअघि भिसा लगायतका कारण आउन नसकेको भन्दै अमिनले भनेका थिए, वाट्मोरले हामीलाई सम्पर्क गरे र नेपालको राष्ट्रिय टिमको प्रशिक्षक हुन लागेको जानकारी गराए । तर उनले सम्भव हुनासाथ आउने बताएका छन् । त्यसैले आगामी सिजन उनी बरोडा आवद्ध हुनेछन् ।’

क्रिकेट संघका अध्यक्ष चन्दका अनुसार वाट्रमोरलाई २०२२ मार्चसम्म बस्न प्रस्ताव गरिएको थियो । त्यो नभए कम्तीमा सम्झौता अवधिभर रहन आग्रह गरेको भए पनि उनले एकतर्फी रुपमा सम्झौता तोडेको भन्दै उनले भने, ‘एउटा जीवन्त संस्थामा आउने जाने भइरहन्छ । यसलाई सामान्य रुपमा लिनुपर्छ ।’

नेपालका पूर्व कप्तान पारस खड्का भने अनुभवी प्रशिक्षक वाट्मोरलाई टिकाउन सकेको भए राम्रो हुन्थ्यो भन्छन् । ‘के कारणले छाड्नुभयो, त्यो उहाँले मात्र भन्न सक्नुहोला,’ खड्का भन्छन्, ‘तर, उहाँलाई राख्न सकेको भए राम्रो हुन्थ्यो ।’