१ असोज, काठमाडौं । सुरक्षाको कारण देखाउँदै न्यूजिल्याण्डको क्रिकेट टिमले अन्तिम समयमा पाकिस्तानसँग खेल्न अस्वीकार गरेको छ ।
पाकिस्तानसँग तीन ओडीआई र पाँच टी–२० म्याच खेल्न न्यूजिल्याण्डको टोली ११ सेप्टेम्बरमा इस्लामावाद पुगेको थियो । तीन ट्रेसिङ सेसन गरेको उसले शुक्रबार रावलपिण्डीमा घरेलु टोलीविरुद्ध पहिलो ओडीआई खेल्नुपर्ने थियो ।
तर भ्रमण टोलीका खेलाडीहरु होटलमै बसे र समर्थकहरुलाई पनि रंगशालामा जान दिइएन ।
केही समयको अन्यौलपछि न्यूजिल्याण्ड क्रिकेट बोर्डले सुरक्षाका कारण टूरलाई निरन्तरता नदिने निर्णय भएको बताएको छ । न्यूजिल्याण्डको टोली अब देश फर्किने तयारीमा छ ।
न्यूजिल्याण्ड क्रिकेट बोर्डका प्रमुख कार्यकारी डेभिड ह्वाइटले भनेका छन्, ‘म बुझ्दछु कि यो पाकिस्तान क्रिकेट बोर्डका लागि झड्का हो, जसले निक्कै राम्रो स्वागत सत्कार गरेको छ । तर हाम्रा लागि खेलाडीहरुको सुरक्षा सर्वोपरी हो र हामीलाई लाग्छ, यो (टूर स्थगित गर्ने) एउटा मात्र जिम्मेवार विकल्प हो ।’
पाकिस्तान क्रिकेट बोर्डले पनि जवाफी वक्तव्य दिएको छ । एकपक्षीय रुपमा टुर स्थगित गरेकोमा असन्तुष्ट उसले बोर्ड र पाकिस्तान सरकारले पाहुना टोलीका लागि सुरक्षाको सम्पूर्ण बन्दोबस्त गरेको बताएको छ ।
पाकिस्तानका प्रधानमन्त्रीले न्यूजिल्याण्डका सामकक्षीसँग पनि सम्वाद गरेको भन्दै बोर्डले सुरक्षाका कारण भ्रमण टोलीले पाकिस्तान छाड्नु नपर्ने बताएको छ ।
प्रतिक्रिया 4