सीता भण्डारी मृत्यु प्रकरणमा गृहमन्त्रीले चासो नदिएको गुनासो

१७ असोज, बुटवल। रूपन्देही मणिग्रामकी २७ वर्षीया सीता भण्डारी पौडेलको शंकास्पद मृत्यु भएको एक महिना पुग्दासम्म छिमेकमा घर भएका गृहमन्त्री बालकृष्ण खाँणले वास्ता नगरेको स्थानीयले गुनासो गरेका छन् ।

गृहमन्त्री खाँण र मृतक सीताको माइत तिलोत्तमा– ८ चार नम्बर एउटै वडा मात्र नभई छिमेक जस्तै हुन् । सीता गत भदौ २० बिहान आफ्नै घरको एक कोठामा मृत भेटिएकी थिइन् । घटनालाई सुनियोजित हत्या दावी गर्दै माइती पक्षले दिनहुंजसो सडक आन्दोलन गर्दै शब उठाउन मानेका छैनन् ।

‘आफ्नै दैलोकी चेलीको शंकास्पद मृत्यु भएको महिना दिन बित्यो, दिनहुँ आन्दोलन भएको छ तर गृहमन्त्रीले वास्तै गर्नुभएन’–मृतकका बुबा हरिप्रसाद भण्डारीले भने, ‘राम्रोसंग अनुसन्धान नै भएको छैन, गृहमन्त्रीले सिरियस भएर एक कल फोन गरिदिने हो भने प्रहरीले दोषी पत्ता लगाउँथ्यो ।’

यो घटनामा राजनीतिक र आर्थिक चलखेल भएको मृतकका माइती पक्ष र स्थानीयको आरोप छ । मृतकका जेठाजु तिलोत्तमा वडा नंं ५ का वडा सदस्य हरि पौडेल एमालेका स्थानीय नेता हुन् ।

माइती पक्षले इलाका प्रहरी कार्यालय बुटवलका डीएसपी मदन कुँवरमाथि पनि आशंका गरेका छन् । ‘बुटवलका डीएसपी र हाम्रा ज्वाईंको परिवारको नजिकको सम्बन्ध छ भन्ने कुरा आएको छ’ भण्डारीले भने, ‘शुरुमा किटानी जाहेरी लिन नमानेको र पछि आन्दोलन चर्केपछि लिइएको हो ।’

मृतकका भाइ सुरज भण्डारीले केन्द्रीय अनुसन्धान ब्युरोको अनुसन्धानपछि जिल्ला प्रहरी कार्यालय रुपन्देहीले सुसाइड नोट फेला परेको भनी प्रेस विज्ञप्ति जारी गर्नु बनावटी र घटनालाई अन्यत्र मोड्ने चालबाजी भएको आरोप लगाए ।

गृहमन्त्री खाँणका स्वकीय सचिव विजेश न्यौपानेले भने गृहमन्त्रीले प्रमुख जिल्ला अधिकारी र प्रहरी प्रमुखलाई घटनाको अनुसन्धान जारी राख्न र सत्य–तथ्य बाहिर ल्याउन निर्देशन दिएको बताउँछन् । ‘जिल्लामा आउन चाहेपनि कामको चाप धेरै भएर आउन नपाउँदा वास्ता नगरेजस्तो परेको मात्र हो,’ न्यौपानेले भने ।

रुपन्देही प्रहरी प्रवक्ता प्रहरी नायब उपरीक्षक सत्यनारायण थापाले शव परीक्षण प्रतिवेदनमा सीताको मृत्युको कारण आत्महत्या देखिएको बताए । अनुसन्धानका क्रममा सीता र उनका श्रीमान टीका पौडेलको मोबाइलको डिजिटल फरेन्सिक ल्याबमा परीक्षण गर्दा सुसाइड नोट लेखेको भेटिएको थापाले बताए ।

प्रहरीले सीताका श्रीमान् टीका, जेठाजु हरिप्रसाद र आमाजु विष्णुलाई पक्राउ गरेको छ । उनीहरूविरूद्ध आत्महत्या दुरुत्साहन मुद्दामा अनुसन्धान भइरहेको छ ।