सिनेमा हलमा हिन्दी र अंग्रेजी फिल्मकै दबदबा

३ मंसिर, काठमाडौं । नेपाली चलचित्रका निर्माताले बल्ल भन्न थालेका छन् कि, दशैंजस्तो ठूलो चाड यसपटक गुमायौं ।

हिन्दी चलचित्र नआएसम्म नेपाली चलचित्र चल्ला कि नचल्ला भनेर पर्खिरहेका निर्माताहरु त्यतिबेला छक्क परे, जतिबेला बलिउड चलचित्र ‘सूर्यवंशी’ले नेपाली सिनेमा हलबाट पैसा मज्जाले उठायो ।

अहिले अधिकांश निर्माताहरु दशैंमा चलचित्र रिलिज नगर्नु गल्ती भएको बताउन थालेका छन् । तर, दशैं र तिहारजस्ता ठूला चाडपर्व यस वर्षका लागि बिदा भइसकेका छन् ।

अहिले मल्टिप्लेक्समा नेपाली चलचित्रको टिकट खोज्न जाने दर्शक हलमा कुनै पनि चलचित्र नदेखेर छक्क पर्नुपर्ने अवस्था छ । कारण, चलचित्र ‘डाँडाको वर पीपल’पछि मल्टिप्लेक्समा कुनै पनि नेपाली चलचित्र चलेका छैनन् । यो क्रम अझै केही समय रहने देखिएको छ ।

मंसिर १६ गतेबाट चलचित्र ‘ओभरडोज’ रिलिज हुँदैछ । तर, नेपाली चलचित्रको उपस्थिति बलियो रुपमा हलमा हेर्नका लागि पुस २ गतेबाट रिलिज हुन लागेको चलचित्र ‘चपली हाइट ३’लाई नै कुर्नुपर्ने हुन्छ ।

दुई साताअघि रिलिज भएको बलिउड चलचित्र ‘सूर्यवंशी’को दबदबा हलमा अझै कायम छ । मल्टिप्लेक्समा यो चलचित्रले तेस्रो हप्तामा पनि उल्लेख्य शो पाएको छ । यसैबीच शुक्रबारबाट चलचित्र ‘बन्टी और बब्ली २’ रिलिज भएको छ । यो चलचित्रले पनि हलमा बलियो उपस्थिति जनाएको छ ।

कमेडी जनराको सैफअली खान, रानी मुखर्जी लगायत कलाकारको अभिनय रहेको यो चलचित्रले पनि दर्शकलाई हलसम्म तान्ने विश्वास गरिएको छ । यीबाहेक मल्टिप्लेक्समा तीनवटा अंग्रेजी चलचित्र पनि चलिरहेका छन् ।