+
+

सर्वोच्चको समस्यामा न्यायालयले निकास नदिए आवश्यक कदम चाल्छौं : प्रचण्ड

जनक विष्ट जनक विष्ट
२०७८ मंसिर ८ गते १०:२५

८ मंसिर, धनगढी । नेकपा माओवादी केन्द्रका अध्यक्ष पुष्पकमल दाहाल (प्रचण्ड)ले न्यायालयमा देखिएको समस्याको समाधान न्यायालयबाटै हुनुपर्ने बताएका छन् । प्रचण्डले न्यायालयबाटै समस्याको समाधान होस् भनेर नै गठबन्धनले अहिलेसम्म कुनै धारणा नबनाएको जनाए ।

बुधबार धनगढी विमानस्थलमा प्रेस सेन्टर कैलालीले आयोजना गरेको पत्रकार सम्मेलनमा बोल्दै प्रचण्डले न्यायालयले निकास दिन नसकेमा सत्तारुढ गठबन्धनको बैठक बसेर आवश्यक कदम चालिने बताए । ‘न्यायालयमा अहिले जुन समस्या देखिएको छ । त्यो सकेसम्म न्यायालयबाटै समाधान हुनुपर्छ भन्ने हाम्रो धारणा हो,’ प्रचण्डले भने, ‘न्यायालयले निकास दिन नसकेमा छिट्टै सत्तारुढ गठबन्धनको बैठक बसेर आवश्यक निर्णय लिन्छौं ।’

प्रचण्डले सर्वोच्च अदालतमा देखिएको समस्याका विषयमा अहिलेसम्म गठबन्धनभित्र छलफल नभएको दाबी समेत गरे । तर हालै सुदूरपश्चिम पुगेर फर्किएका सत्तारुढ दल एकीकृत समाजवादीका अध्यक्ष माधवकुमार नेपालले भने गठबन्धनको बैठक बसेर अदालतको समस्या समाधानका लागि आवश्यक पहल गर्ने निर्णय भएको बताएका थिए ।

एमसीसीको सन्दर्भमा बोल्दै प्रचण्डले जनतालाई बुझाएर मात्र पारित गर्नुपर्छ  भन्ने आफ्नो धारणा रहेको जनाए । सत्ता गठबन्धनबारे केही मानिसले आफ्नो स्वार्थ अनुकूल बोलिरहेकाले त्यसमा कुनै सत्यता नरहेको दाबी उनले गरे ।

अहिलेको गठबन्धनले चुनावसम्म निरन्तरता पाउने दाबी प्रचण्डले गरे । हाल नेकपा माओवादी केन्द्रले नेतृत्व गरिरहेको सुदूरपश्चिम प्रदेश सरकार पनि परिवर्तन नहुने उनले बताए ।

बुधबार बिहान धनगढी आइपुगेका प्रचण्ड भजनी नगरपालिकाको नवनिर्मित कार्यालय भवन उद्घाटन गर्न पूर्वी कैलाली प्रस्थान गरेका छन् । उनी यहाँ रहँदा विभिन्न ठाउँमा पार्टीले आयोजना गर्ने कार्यक्रममा सहभागी हुने माओवादी केन्द्रले जनाएको छ ।

यो खबर पढेर तपाईलाई कस्तो महसुस भयो ?

Khusi
                                chhu

खुसी

Dukhi
                                chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment