९ मंसिर, काठमाडौं। वाई वाई यू-१९ पुरुष राष्ट्रिय क्रिकेट प्रतियोगितामा प्रदेश १ ले बिहीबार मुलपानी मैदानमा भएको खेलमा कर्णाली प्रदेशलाई ७६ रनले पराजित गरेको छ । जारी प्रतियोगितामा प्रदेश-१ को यो लगातार दोस्रो जित हो ।
प्रदेश-१ ले दिएको २४० रनको उच्च लक्ष्य पछ्याएको कर्णालीले ३८ ओभरमा सबै विकेट गुमाएर १६३ रन मात्र बनाउन सक्यो । पहिलो खेलमा लुम्बिनीमाथि शानदार जित हासिल गरेको कर्णालीको यो पहिलो हार हो ।
कर्णालीका लागि रुपक दाहालले अविजित रहँदै सर्वाधिक ४१ रन बनाए । यस्तै मनिस थापाले ३९ रन जोडे ।
कर्णालीलाई अलआउट गर्न प्रदेश १ का श्रवण किस्कुले सर्वाधिक ४ विकेट लिए । यस्तै लव कामतले ३, गौरव कटुवालले २ र दिपेश कँडेलले १ विकेट लिए ।
त्यसअघि टस जितेर पहिले ब्याटिङ गरेको प्रदेश १ ले निर्धारित ५० ओभरमा सबै विकेट गुमाएर २३९ रन बनाएको थियो ।
प्रदेश १ का लागि विवेक आनन्द मेहताले सर्वाधिक ५३ रन बताए । यस्तै अंकित सुवेदीले ३७, सोनु मण्डलले २५, सोनी अन्सारीले २४ तथा दिपक जोशीले २३ रन जोडे ।
कर्णालीका लागि अनुज कुमार चनारा, रुपक दाहाल र सान्दीप जंग शाहीले २-२ विकेट लिए ।
प्रतिक्रिया 4