१४ मंसिर, काठमाडौं । वाईवाई यू-१९ पुरुष राष्ट्रिय क्रिकेट प्रतियोगितामा मंगलबार बागमती प्रदेशले कर्णाली प्रदेशमाथि १ विकेटको संघर्षपूर्ण जित निकालेको छ ।
मूलपानी मैदानमा भएको खेलमा कर्णालीले दिएको ७९ रनको सामान्य लक्ष्य बागमतीले १९.५ ओभरमा पूरा गर्न ९ विकेट खर्चनुपर्यो ।
प्रतियोगितामा बागमतीको यो दोस्रो जित हो । ५ खेलबाट बागमतीले ४ अंक जोडेको छ । उता पाँच खेल खेल्दा चार खेलमा हार बेहोरेको कर्णाली भने प्रतियोगिताबाट बाहिरिएको छ ।
बागमतीको जितमा विवेक मगरले सर्वाधिक १८ रन बनाउँदा क्रिस कार्कीले १२ तथा उत्तम मगरले ११ रन जोडे । गौतम केसीले छक्का प्रहार गर्दै बागमतीलाई जित दिलाएका थिए । उनले ३ बल खेल्दै अविजित ७ रन जोडे ।
कर्णालीका अनुज चुनाराले सर्वाधिक ५ विकेट लिएपनि जितका लागि पर्याप्त भएन । प्रकाश जैसी, सुवास ऐयर र युनिस सिंहले समान १ विकेट लिए ।
त्यसअघि टस हारेर पहिले ब्याटिङ गरेको कर्णाली २७.१ ओभरमा सबै विकेट गुमाएर ७८ रन मात्र बनाउन सक्यो ।
कर्णालीका लागि कप्तान निश्चल रावलले सर्वाधिक १५ रन बनाउँदा सन्दीप शाहीले १४, विपिन रावलले १२ र रुपक दाहालले १० जोडे ।
कर्णालीलाई अलआउट गर्न बागमतीका गौतम केसीले सर्वाधिक ४ विकेट लिए । यस्तै विशाल यादवले ३, क्रिस कार्कीले २ र विपुल खनालले १ विकेट लिए ।
प्रतिक्रिया 4