मोरिससविरुद्धको लागि दुई नेपाली टोली घोषणा

१२ माघ, काठमाडौं । नेपाली राष्ट्रिय फुटबल टिमका मुख्य प्रशिक्षक अबदुल्लाह अलमुताइरीले अफ्रिकन राष्ट्र मोरिससविरुद्ध हुने दुई मैत्रीपूर्ण खेलका लागि नेपाली टोली घोषणा गरेका छन् ।

नेपालले यही माघ १५ र १८ गते दशरथ रंगशालमा मोरिसससँग दुई अन्तर्राष्ट्रिय मैत्रीपूर्ण खेल खेल्दैछ । जसमा प्रशिक्षक अलमुताइरीले दुई खेलका लागि दुई फरक टोली घोषणा गरेका छन् । उनले बन्द प्रशिक्षणमा रहेका ३४ खेलाडीबाट बुधबार दुई टिम घोषणा गरेका हुन् ।

जसमा जगजित श्रेष्ठ र विमल घर्ती मगरले पुनरागमन गरेका छन् । जगजितले नेपालका लागि पछिल्लो पटक सन् २०१५ मा भारतमा भएको साफ च्याम्पियनसिप खेलेका थिए । यस्तै विमल सन् २०१९ पछि पहिलो पटक राष्ट्रिय टिममा परेका हुन् । दुवै खेलाडीले शहीद स्मारक ए डिभिजन लिगमा राम्रो प्रदर्शन गरेका थिए । जगजितले त्रिभुवन आर्मी एफसी र विमलले मछिन्द्र एफसीबाट लिग खेलिरहेका छन् ।

माघ १५ गते हुने खेलका लागि घोषित २३ सदस्यीय टोलीमा जगजित र विमलले पुनरागमन गर्दा सुदिप गुरुङ, टिकेन्द्र थापा, आकाश बुढा मगर र कृतिश रत्न छुन्जु पहिलो पटक राष्ट्रिय टिममा परेका छन् ।

यस्तै माघ १८ हुने दोस्रो खेलका लागि विमल पनि टिममै छन् भने शत्रुघन चौधरी, आशिष राई, नविन गुरुङ, सुशिल राई र प्रशान्त अवस्थीले पहिलो पटक टिममा स्थान बनाएका छन् ।

प्रशिक्षक अलमुताइरीले पहिलो पटक बन्द प्रशिक्षणमा परेका ९ खेलाडीलाई नै राष्ट्रिय टिममा अवसर दिएका छन् । प्रशिक्षक अलमुताइरीले नतिजाका लागि भन्दा पनि खेलाडीलाई एक्पोजर दिनका लागि आफू केन्द्रित रहेको बताएका छन् । ‘म खेलाडीले अन्तर्राष्ट्रिय खेलमा एक्सपोजर पाओस् भन्ने चाहन्छु । यसले उनीहरूलाई थप अनुभव दिएर भविष्यको लागि तयार गर्न मद्दत गर्नेछ । म नतिजाभन्दा राम्रो प्रदर्शनको अपेक्षा गरेको छु,’ अलमुताइरीको भनाइ उल्लेख गर्दै एन्फा डटकमले लेखेको छ ।