कीर्तिमानी करण भन्छन् – अझै चार–पाँच पटक ह्याट्रिक गर्न सकूँ

१७ चैत, काठमाडौं । पपुवा न्यूगिनीसँगको टी–२० क्रिकेटमा ह्याट्रिकसहित ५ विकेट लिएका करण केसीले यो आफ्नो लागि विशेष रहेको बताएका छन् ।

खेलपछि त्रिवि क्रिकेट मैदान कीर्तिपुरमा पत्रकारसँग कुरा गर्दै उनले भने, ‘ह्याट्रिक पनि, ५ विकेट पनि, टी–२० आईमा यो मेरो वेष्ट फिगर नै हो ।’

३.४ ओभर बलिङ गरेका उनले २१ रन दिएर ह्याट्रिकसहित ५ विकेट लिएका थिए । टी–२० अन्तर्राष्ट्रिय क्रिकेटमा यो नेपाली बलरको अहिलेसम्मकै उत्कृष्ट बलिङ हो ।

यो सफलताबाट खुसी भएका उनले भने, ‘आउँदा दिनमा पनि चार–पाँच पटक यस्तो गर्न सकूँ ।’

१९.२ ओभरमा आफ्नो तेश्रो विकेट लिएका उनले १९.३ मा चौथो र १९.४ मा पाँचौ विकेट लिँदै खेल सकाएका थिए । ह्याट्रिक बलमा पीएनजीका ब्याटर नाेसैना पोकनाको ब्याटमा लागेर बल माथि उठे लगत्तै उनले खुसी मनाएका थिए ।

बल क्याच नै नभई किन खुसी मनाएको भन्ने पत्रकारको प्रश्नमा उनले भने ‘क्याचमा दिपी (दिपेन्द्र सिंह ऐरी) थियो, उमाथिको विश्वासले क्याच नहुँदै सेलिब्रेट गरें ।’