२९ चैत, काठमाडौं । नेपाली राष्ट्रिय फुटसल टोलीले तेस्रो पटक एएफसी फुटसल एसियन कप छनोट खेल्दा अहिलेसम्म एक खेल पनि जित्न सकेको छैन ।
कीर्गिस्तानको बिस्केकमा भइरहेको फुटसल एसियन कप २०२२ को छनोटमा मंगलबार अफगानिस्तासँग ८-१ ले पराजित भएपछि यस पटक कम्तीमा एक खेल जित्ने नेपालको लक्ष्य समेत पूरा हुन सकेन ।
सेन्ट्रल तथा साउथ जोन अन्तर्गत समूह बी मा रहेको नेपालले लगातार तेस्रो खेलमा पराजित बेहोर्यो ।
पहिलो हाफमा अफगानिस्तानले नेपालमाथि दबाब बनाउँदै दुई गोल गरेको थियो । नेपालले पनि गोल गर्ने अवसर पाएपनि सदुपयोग गर्न सकेन ।
दोस्रो हाफमा अफगानिस्तानले ६ गोल थप्दा नेपालले एक गोल मात्र फर्काउन सक्यो । नेपालका लागि सुमित श्रेष्ठले एक गोल गरे ।
नेपाल भन्दा केही माथिल्लो स्तरको टिम अफगानिस्तासँग नेपालले राम्रो गर्ने आश गरेपनि प्रदर्शनमा त्यो देखिएन । यसअघि सन् २०१९ मा भएको छनोटमा नेपाल अफगानिस्तानसँग ६-२ ले पराजित भएको थियो ।
नेपाली टिमका प्रशिक्षक गौरव बस्नेतले छनोटको खेलअघि नै कम्तीमा एक खेल जित्ने लक्ष्य रहेको र धेरै आशा नराखेको बताएका थिए । तीन खेलपछि नेपालको प्रदर्शन पनि प्रशिक्षकले भने जस्तै नै रह्यो । तर एक खेल जित्ने लक्ष्य भने पूरा हुन सकेन ।
नेपाल रहेको समूहमा फुटसलको ‘पावर हाउस’ टिमहरु उज्वेकिस्तान र ताजकिस्तान जस्ता टिम थिए ।
पहिलो खेलमा नेपाल बलियो टोली उज्वेकिस्तानसँग ५-१ ले पराजित भएको थियो ।
दोस्रो खेलमा नेपाल सुरुवाती अग्रता लिनका बावजुत पनि ताजकिस्तानसँग ११-१ को फराकिलो अन्तरले पराजित भयो । पहिलो हाफमा १-१ को बराबरी खेलेको नेपालले दोस्रो हाफमा १० गोल बेहोरेको थियो ।
लगातार दोस्रो हारपछि नेपाल छनोटबाट बाहिरिसकेको थियो । अन्तिम खेल जित्दै सुदख अन्त्य गर्ने नेपालको लक्ष्य भने पूरा हुन सकेन ।
लगातार तीन हारपछि नेपाली प्रशिक्षक गौरव बस्नेत दु:ख व्यक्त गरे । ‘यो दु:खद छ हामी छनोट हुन सकेनौँ ।’
उनले खेलमा अवसर बनाएपनि फिनिस गर्न नचुकन् कमजोरी हरेको बताए । ‘हामीले अवसरहरु बनायौँ तर फिनिस गर्न सकेनौँ ।’ बस्नेतले खेलपछि भने । हामीले धेरै अनुभव बटुल्ने अवसर पायौँ । यस प्रतियोगिताबाट हामी आगामी प्रतियोगिताबाट अझ राम्रो तयारी गर्नेछौँ ।’
नेपालले तीन खेलमा जम्मा ३ गोल गर्दा २४ गोल बेहोर्यो ।
सन् २०१७ मा पहिलो पटक छनोट खेल्दा नेपालले ४ गोल गरेको थियो भने २८ गोल बेहोरेको थियो । यस्तै २०१९ मा छनोट चरण खेल्दा नेपालले ३ गोल गरेको थियो भने १६ गोल बेहोरेको थियो ।
प्रतिक्रिया 4