गुगल सर्चबाट आफ्नो व्यक्तिगत जानकारी हटाउन कसरी निवेदन दिने ?

काठमाडौं । गुगलले व्यक्तिगत पहिचान गराउने खालका जानकारीहरु गुगल सर्चबाट हटाउने निर्णय गरेको छ ।

व्यक्तिगत पहिचानको चोरी, वित्तीय ठगी, हानीकारक प्रत्यक्ष सम्पर्क तथा अन्य विभिन्न हानी नोक्सानीको परिणाम ल्याउनसक्ने सम्भावना भएका व्यक्तिगत पहिचानयुक्त जानकारीहरु (पर्सनल्ली आइडेन्टिफायबल इन्फर्मेसन) लाई हटाउने घोषणा गुगलले गरेको हो ।

साथै गुगलले व्यक्तिगत जानकारी हटाउनका लागि भन्दै आउने निवेदनका बारेमा निश्चित मापदण्डमा रहेर मूल्यांकन गरिने र त्यस्तो पुष्टि भएमा मात्र हटाइने जनाएको छ ।

निवेदनको मूल्यांकनका आधारमा गुगलले सबै अनुरोध बमोजिमका URL हरु हटाउने, निवेदकको आफ्नो नाम संलग्न URL मात्र हटाउन सक्नेछ । त्यस्तै निवेदनको मूल्यांकन गर्दा दाबी गरिएबमोजिम व्यक्तिगत पहिचानको जानकारी नरहेको पाइएमा गुगल सर्चबाट त्यस्तो सामग्री हटाउने छैन ।

गुगलका अनुसार गुगल सर्चबाट हटाउनका लागि निवेदन गर्न सकिने व्यक्तिगत पहिचानयुक्त जानकारीहरु यी हुन् –

गोप्य सरकारी परिचयपत्र नम्बर जस्तै अमेरिकाको सामाजिक सुरक्षा नम्बर, अर्जेन्टिनाको एकल कर पहिचान नम्बर, ब्राजिलको Cadastro de pessoas Fisicas, कोरियाको बासिन्दा दर्ता नम्बर, चीनको बासिन्दा परिचय कार्ड आदि ।
बैंक अकाउन्ट नम्बर
क्रेडिट कार्ड नम्बर
हस्तलिखित दस्तखतको तस्वीर
परिचयपत्र कागजातका तस्वीर
चिकित्सा रेकर्ड लगायतका नितान्त व्यक्तिगत, गोप्य तथा आधिकारीक अभिलेखहरु
गोप्य लगइन क्रेडेन्सियल (आइडी तथा पासवर्ड)

गुगल सर्चमा उल्लेखित सामाग्री हटाउनका लागि सबैभन्दा पहिले निवेदकका उल्लेखित कुनै सामाग्रीहरु गुगल सर्चमा उपलब्ध हुनुपर्नेछ । त्यस्ता सामाग्रीका कारण प्रत्यक्ष वा अप्रत्यक्ष खतरा रहेको हुनुपर्ने बताइएको छ ।

यसरी गुगल सर्चमा रहेका आफ्ना व्यक्तिगत पहिचानयुक्त जानकारी संलगन सामाग्रीको लिंक हटाउनका लागि व्यक्ति स्वयं वा उसको अधिकारप्राप्त व्यक्तिले गुगलमा निवेदन दिनसक्ने छ । निवेदन दिनका लागिः

https://support.google.com/websearch/troubleshooter/9685456#ts=2889054%2C2889099 क्लिक गरी request फाराम खोल्नुहोस् । त्यहाँ तपाईंले तीन वटा महत्वपूर्ण प्रश्नको जवाफ दिनुपर्ने हुन्छ ।
What do you want to do ? भन्ने प्रश्नमा तपाईंले आफूले गर्न चाहेको कुरा भर्नुहोस् ।
Let us know where you saw the information you want to have removed मा गुगल सर्चमा आफूले हटाउन चाहेको सामाग्री कहाँ फेला परेको हो ? उल्लेख गर्नुहोस् ।
The information I want removed is भन्ने प्रश्नमा गुगल सर्च रिजल्ट र वेबसाइट दुबैमा हो कि गुगल सर्चमा मात्रै हटाउन खोजेको हो चयन गर्नुहोस् ।
सबै आवश्यक जानकारी भरिसकेपछि तपाईंले आफ्नो इमेल ठेगाना, फोन नम्बर, पूरा नाम लगायतका व्यक्तिगत जानकारीहरु पनि भर्नुपर्नेछ ।

यसरी निवेदन दिइसकेपछि निवेदन प्राप्त भएको भनी तपाईंको इमेलमा तत्कालै अटोमेटेड इमेल कन्फर्मेसन प्राप्त हुनेछ । त्यसपछि गुगलले तपाईंको निवेदनमाथि मूल्यांकन गरी तपाईंको दाबी र अनुरोधले माथि उल्लेखित मापदण्ड पूरा गर्ने नगर्ने निर्क्यौल गर्नेछ ।

गुगलले कतिपय अवस्थामा निवेदकलाई आफ्नो दाबी सम्बन्धमा थप जानकारीहरुको पनि माग गर्न सक्दछ ।

सबै प्रक्रिया पूरा भैसकेपछि निवेदन अनुसार सामाग्री हटाइएको वा हटाउनु नपर्ने निर्णय भएको भए पनि सोही कुराको समेत जानकारी गराएर गुगलले तपाईंलाई इमेल पठाउनेछ । एजेन्सीको सहयोगमा