नेपालमा ‘पाँच तारे डिलक्स’ होटल एउटा, पाँचतारे होटल १७ पुगे

२४ जेठ, काठमाडौं । नेपालमा पाँच तारे र सो स्तरभन्दा माथिको होटल संख्या १८ पुगेको छ । पर्यटन विभागले सार्वजनिक गरेको नयाँ वर्गीकरण अनुसार पाँचतारे डिलक्स होटलको स्तरमा एक र पाँच तारे स्तरको होटल संख्या १७ पुगेको छ ।

पर्यटन विभागका अनुसार झापाको धुलाबारीमा सञ्चालनमा आएको भेगस सिटी इन्टरटेन्मेन्ट प्रालिको होटल मेची क्राउन प्लाजा पाँच तारा डिलक्स होटलको स्तरमा सूचीकृत भएको छ । कुल १०१ कोठा रहेको यो होटलमा १८५ वटा शय्या छन् । होटलले ११० जनालाई प्रत्यक्ष रोजगारी दिएको छ ।

पाँचतारे स्तरका १७ वटा होटलमा २ हजा ७७६ वटा कोठा रहेका छन् । यी होटलले एक साथ ४ हजार १६० जना पाहुनालाई सेवा दिन सक्छन् । नेपालमा रहेका कुल पाँचतारे होटलले ३ हजार ८६८ जनालाई प्रत्यक्ष रोजगारी दिएको देखिएको छ ।

पर्यटन विभागका अनुसार पछिल्लो समय झापाको विर्तामोडमा खुलेको होटल द किङ्सवरी र काठमाडौंको ताहाचलमा खुलेको सिटी होटल लिमिटेड (हायात प्लेस) ले पाँचतारे स्तरको वर्गीकरण पाएका छन् ।

पाँचतारे होटलमध्ये बढी रोजगारी सिर्जना गर्नेमा सोल्टी होटल र तारागाउँ रिजेन्सी (हायात रिजेन्सी) रहेका छन् । यी दुई होटलले क्रमशः ५५० र ४१० जनालाई रोजगारी दिएको देखिएको छ ।

यी हुन् नेपालका पाँचतारे होटल

स्रोत : पर्यटन विभाग

कसरी हुन्छ वर्गीकरण ?

संस्कृति, पर्यटन तथा नागरिक उड्डयन मन्त्रालयले ५ माघ २०७७ मा राजपत्रमा एक सूचना जारी गर्दै एकतारेदेखि पाँच तारे डिलक्ससम्मका होटलको वर्गिकरणका लागि मापदण्ड तोकेको थियो । सो मापदण्ड पूरा गर्ने होटलले स्तर अनुसार तारा पाउँछन् । होटल रहने क्षेत्रफलदेखि संरचना सहितको अनुगमनपछि विभागले स्तर निर्धारण गर्छ ।

हेरिटेज र बुटिकको छुट्टै वर्गीकरण

पर्यटन विभागले हेरिटेज र बुटिक होटलको वर्गीकरण भने छुट्टै गरेको छ । विभागका अनुसार नेपालमा यस्तो वर्गीकरणमा कुल ४ वटा होटल अटाएका छन् । खासगरी मौलिक डिजाइनमा बनेको संरचनाका होटललाई यस्तो वर्गीकरणमा राखेर अलग्गै सूचीकरण गर्न थालेको हो ।

विभागका अनुसार काठमाडौंको बत्तिसपुतलीस्थित द्वारिकाज काठमाडौं भिलेज होटल यो सूचीमा रहेको छ । कुल १३७ कोठा रहेको होटलमा २७४ शय्या छन् । द्वारिकाजले ३०५ जनालाई रोजगारी दिएको छ ।

नेपालमा हेरिटेज र बुटिक होटलले कुल ३३९ कोठा छन् । यी कोठामा ५५४ शय्या रहेका छन् । हेरिटेज र बुटिक होटलले ४९८ जनालाई प्रत्यक्ष रोजगारी दिएका छन् ।

हेरिटेज र बुटिक होटलमा कुन कुन परे ?

स्रोत : पर्यटन विभाग

यसअघि विभागले रिसोर्टको वर्गीकरण सार्वजनिक गरेको थियो । रिसोर्टमध्ये चन्द्रागिरिस्थित चन्द्रागिरि हिल्स रिसोर्ट र गोकर्णस्थित गोकर्ण फरेष्ट रिसोर्ट ‘लक्जरी रिर्सोट’को स्तरमा कायम गरिएको छ । विभागका अनुसार देशभर तीन वटा रिसोर्टले डिलक्स रिसोर्टमा वर्गीकृत भएका छन् ।

यो पनि पढ्नुहोस

रिसोर्टको वर्गीकरण : चन्द्रागिरि र गोकर्ण ‘लक्जरी’

विभागका अनुसार बनेपास्थित आगन्तुक रिसोर्टले २०७७ सालमा डिलक्स मान्यता पाएको थियो । पछिल्लो पटक २०७८ साल चैतमा सरकारले कास्कीको बरपिपल रिसोर्ट र कपिलवस्तुको लुम्बिनी ग्रीन रिसोर्टलाई डिलक्स रिसोर्टमा सूचिकरण गरेको हो । देशभर सञ्चालनमा रहेका १ सय ९ वटा रिर्सोटलाई साधारण रिसोर्टको सूचीमा राखिएको छ ।