मेसीलाई फर्काउन बार्सिलोनाका अध्यक्षसँग जाभीको प्रस्ताव

१० साउन, काठमाडौं । लिओनल मेस्सी र जाभी हर्नान्डेज बार्सिलोनका लेजेण्ड खेलाडी हुन् । कुनै बेला यो जोडी खुबै जमेको थियो । तर अहिले अवस्था फेरिएको छ । जाभी २०१५ मा बार्सिलोना छाडेर कतारी क्लब अल साद गए । त्यहाँ खेले पछि प्रशिक्षक पनि बने । हाल उनी बार्सिलोनाङमै प्रशिक्षक छन् ।

मेसी भने २०२१ मा बार्सिलोना छाडेर फ्रेन्च क्लब पेरिस सेन्ट जर्मेन (पीएसजी) पुगे । जहाँ उनले दुई वर्षको सम्झौता गरे । साथै एक वर्षको सम्झौता थप गर्ने विकल्प समेत छ । एक सिजन पेरिसमा बिताइसकेका मेसीको सम्झौता त्यहाँ अझै एक सिजन बाँकी छ । गत सिजन अघि मेसीले बार्सिलोना छाड्दा मेसी मात्र होइन, क्लबका खेलाडी, पदाधिकारीदेखि क्लब समर्थक सबै दु:खी भएका थिए ।

अहिले उनै जाभी मेस्सीलाई बार्सिलोना फर्केको हेर्न चाहन्छन् । उनी मात्र होइन क्लब र समर्थकको पनि त्यो चाहना छ । मेसीको मनको भित्री कुनामा पनि त्यो चाहना छ कि फेरि बार्सिलोनामै फर्केर खेल जीवन सकाउने ।

प्रशिक्षक जाभीले क्लबका अध्यक्ष जोन लापोर्टासामु प्रस्ताव गरेका छन्, ‘जति बेला पीएसजीमा मेस्सीको सम्झौता सकिनेछ त्यसपछि मेसीलाई बार्सिलोना फर्काउनुपर्छ ।’

अन्तर्राष्ट्रिय सञ्चार माध्यमहरुमा आएका समचार अनुसार जाभी र मेस्सीको राम्रो सम्बन्ध छ । जसले गर्दा जाभीले मेस्सीलाई पर्काउने विषयमा क्लबलाई विश्वासमा लिन सक्नेछन् । नयाँ सिजन सकिएपछि अर्को वर्ष मेसीलाई फर्काउने विषयमा अध्ययन गर्न जाभीले लापोर्टालाई भनिसकेको स्पानिस अनलाइन स्पोर्ट्सले उल्लेख गरेको छ ।

पीएसजीमा सम्झौता सकिँदा मेस्सी ३६ वर्षका हुनेछन् । तर मेस्सीको अनुभव खेलमा काम लाग्ने जाभीको बुझाइ छ ।

हाल प्रि सिजन टुरमा अमेरिकामा रहेका प्रशिक्षक जाभीलाई युभेन्ट्ससँगको खेलअघि मेसी फर्कने सम्भावनाको बारेमा सोधिएको थियो । जहाँ उनले भने, ‘उनको सम्झौता बाँकी छ । हामी भविष्यमा हेर्ने छौं । अहिले त्यो समय होइन । अहिले समय आफ्नै खेलाडीको बारे कुरा गर्ने हो ।’

पीएसजीले पनि मेस्सीलाई क्लबमै राख्ने प्रयास गर्न सक्छ । यद्यपी बार्सिलोनाका अध्यक्ष लापोर्टाले मेस्सीले सन्यास लिनुअघि बार्सिलोना फर्कने सक्ने सम्भावनालाई नकारेका छैनन् । ‘बार्सिलोनामा मेस्सीको च्याप्टर सकिएकोमा मलाई विश्वास छैन,’ लापोर्टाले इएसपीएनसँग भनेका छन्, ‘र म विश्वास गर्छु कि यो अध्याय अझै खुला छ, यो बन्द भएको छैन भनेर सुनिश्चित गर्नु हाम्रो जिम्मेवारी हो ।’