७ भदौ, काठमाडौं । ढिलो भिसा आएपछि पाँच खेलाडी, व्यवस्थापक र ट्रेनर सोमबार केन्या उड्न पाएनन् । ११ खेलाडी, मुख्य प्रशिक्षक मनोज प्रभाकर, फिजियो विक्रम न्यौपाने र एनालिस्ट रमन शिवाकोटीसहित १४ जना सोमबार राति केन्याको राजधानी नैरोबी प्रस्थान गरेका थिए ।
बाँकी पाँच खेलाडीसहित ७ जना भने आज (मंगलबार) राति मात्रै केन्या प्रस्थान गर्नेछन् ।
उनीहरूको एल्लो फिभर भ्याक्सिन कार्ड अपलोड नभएकोले भिसा आउन ढिला भएको व्यवस्थापक सुनिल महासेठले जानकारी दिए । ‘अरुको नामिबिया गएकै बेला येल्लो भ्याक्सिन फिभर कार्ड थियो । बाँकीको येल्लो भ्याक्सिन कार्ड अपलोड हुन समय लागेकोले भिसा आउन ढिला भएको हो ।’
बाँकी ७ जनाको भिसा आएको र मंगलबार राति केन्या प्रस्थान गर्ने महासेठले जानकारी दिए । व्यवस्थापक सुनील महासेठ, ट्रेनर भारतका अब्दुल सतार र ५ खेलाडी सोमपाल कामी, बसिर अहमद, शाहब आलम, आदिल अलाम र विवेक यादव दोस्रो चरणमा केन्या जानेछन् ।
नेपालले केन्या भ्रमणमा पाँच टी-२० अन्तर्राष्ट्रिय र तीन एकदिवशीय खेल खेल्ने तालिका छ । नेपाल र केन्याबीचको पहिलो टी-२० बिहीबार हुनेछ ।
प्रतिक्रिया 4