तीन वर्षदेखि स्थगित भारती खरेल स्मृति पुरस्कार यस वर्ष वितरण गरिंदै

काठमाडौं। कोरोना महामारीका कारण तीन वर्षदेखि स्थगित भारती खरेल स्मृति पुरस्कार यो वर्ष वितरण गरिने भएको छ। २०७७ सालदेखि स्थगित भएको पुरस्कार वितरण आगामी मंसिरमा मुलुकका तीन जना स्रष्टा र समाजसेवीलाई दिइने घोषणा गरिएको भारती खरेल प्रतिष्ठानले जनाएको छ ।

प्रतिष्ठानको शुक्रबार बसेको बैठकले २०७७, २०७८ र २०७९ सालको भारती खरेल स्मृति पुरस्कार क्रमशः  वरिष्ठ गीतकार किरण खरेल, माइती नेपालका संस्थापक अनुराधा कोइराला र वरिष्ठ समालोचक वासुदेव त्रिपाठीलाई दिइने निर्णय गरेको सदस्य सचिव प्रयागराज भट्टराई वशिष्ठले बताए । उनका अनुसार यो पुरस्कारमा सम्मानपत्र सहित ५१ हजार रुपैयाँ राशी राखिएको छ ।

भक्तिमति एवं विशिष्ट साहित्य साधिका स्वर्गीय भारती खरेलको ८५ औं जयन्तीका अवसरमा यो पुरस्कार वितरण गर्न लागिएको हो । भक्तिमति एवं विशिष्ट साहित्य साधिका स्वर्गीय भारती खरेलको स्मृतिमा उनका पति एवं समाजसेवी चन्द्रिकानन्द खरेल र छोरा एवं गायक दीपक खरेल लगायतले २०४९ सालमा प्रतिष्ठान स्थापना गरेका थिए । प्रतिष्ठानले हरेक वर्ष मंसिर १६ गते एक समारोहको आयोजना गरी पुरस्कार प्रदान गर्दै आइरहेको छ ।