पाँच सय वर्ष पुरानो जापानको शौचालयमा कार ठोक्किएपछि…

सांस्कृतिक सम्पदा संरक्षण गर्ने काममा सक्रिय एक जापानी नागरिकले त्यहाँको सदियौं वर्ष पुरानो बौद्ध मन्दिरमा रहेको देशकै पुरानो शौचालयमा भूलवस आफ्नो कार ठोक्काए । दुर्घटनाबाट ५०० वर्ष पुरानो उक्त शौचालयमा क्षति पुग्यो ।

जापानको पश्चिमी क्योटो क्षेत्रस्थित टोफुकुजी मन्दिरमा रहेको उक्त शौचालय जापानमा अहिलेसम्म रहेको सबैभन्दा पुरानो शौचालय हो, जुन १५ औं शताब्दीमा बनेको हो । त्यसैले शौचालय हुनुका बाबजुद यसले जापानमा महत्वपूर्ण सांस्कृतिक तथा पुरातात्विक सम्पदाको मान्यता पाएको थियो ।

प्रहरीका अनुसार क्योटो सम्पदा संरक्षण संघका एक सदस्य समेत रहेका ती ३० वर्षे युवकले आफ्नो कार ब्याक गर्ने क्रममा उक्त ट्वाइलेटमा कार ठोक्काउँदा शौचालयको काठको ढोका क्षतिग्रस्त भएको छ ।

प्रहरीका अनुसार उक्त क्षतिग्रस्त ढोकाको मर्मत गर्न निकै मेहनत गर्नुपर्नेछ । कारको ठक्करबाट भित्रको पर्खालमा पनि सामान्य क्षति पुगेको छ, तर शौचालयको शौच गर्ने भागमा भने क्षति पुगेन ।

स्थानीय संरक्षण अधिकारी नोरिहिको मुराताका अनुसार परम्परागत रुपमा भिक्षुहरुद्वारा उनका तपस्वी प्रशिक्षणको एक भागका रुपमा सो शौचालय प्रयोग हुने गर्दथ्यो । यद्यपि हाल उक्त शौचालय प्रयोगमा छैन ।

एजेन्सीको सहयोगमा