सुनकोशीमा खसेको बेपत्ता कारको खोजीका लागि गोताखोर परिचालन

News Summary

Generated by OK AI. Editorially reviewed.

सिन्धुलीको फिक्कल गाउँपालिका–२ स्थित मध्यपहाडी लोकमार्गबाट कार सुनकोशी नदीमा खसेपछि बेपत्ता तीन जनाको खोजीका लागि गोताखोरसहितको टोली परिचालन गरिएको छ ।
खोटाङबाट काठमाडौंतर्फ आउँदै गरेको कारलाई बसले ठक्कर दिँदा कार सडकबाट ३० मिटर तल नदीमा खसेको थियो ।
दुर्घटनामा परेका कार चालक र अन्य दुई जना बेपत्ता भएका छन् भने बसका चालकलाई प्रहरीले नियन्त्रणमा लिएको छ ।

१८ साउन, काठमाडौं । सिन्धुलीको फिक्कल गाउँपालिका–२ नवलपुरस्थित मध्यपहाडी लोकमार्गबाट खसेको कारको खोजीका लागि गोताखोरसहितको टोली परिचालन भएको छ ।

सशस्त्र प्रहरी बल नेपाल विपद् व्यवस्थापन वेश खुर्कोटबाट गोताखोरसहितको टोली परिचालन भएको हो ।

खोटाङबाट काठमाडौंतर्फ आउँदै गरेको कारलाई काठमाडौँबाट ओखलढुंगातर्फ जाँदै गरेको बागमती प्रदेश ०८–००१ ख ०१४४ नम्बरको बसले ठक्कर दिएपछि कार सडकबाट अन्दाजी ३० मिटर तल सुनकोशी नदीमा खसेको थियो ।

बेपत्ता कारको खोजीकार्यमा सो वेशबाट सशस्त्र प्रहरी निरीक्षक निरेन्द्र गुरुङको कमाण्डमा गोताखोरसहितको टोली र नेपाल प्रहरीको टोली समेत परिचालन भएको छ ।

उक्त कारमा सवार सिन्धुपाल्चोक बस्ने दिलकुमार लामा, सिन्धुली जिल्लाको गोलन्जोर गाउँपालिका–१ बस्ने २८ बर्षिय गणेश थापा र वतन नखुलेका अर्का एक जना समेत वेपत्ता भएका छन् भने बसका चालकलाई नेपाल प्रहरीले नियन्त्रणमा लिएको छ ।