मेकअपमाथि पनि लगाउन सकिन्छ सनस्क्रिन, यस्ता छन् तरिका

दैनिक कार्यालय, कलेज वा अन्य कामका लागि घरबाट बाहिर निस्कने अधिकांश महिलाले अनुहारलाई आकर्षक देखाउन हल्का–फुल्का मेकअप गर्ने गर्छन् । तर मेकअप गरेपछि सनस्क्रिन कसरी लगाउने भन्ने कुराले धेरैलाई अन्योलमा पारिरहेको हुन्छ ।

कतिपय महिलाले मेकअप बिग्रिने डरले दिनभरि दोहोर्‍याएर सनस्क्रिन नै लगाउँदैनन् । यसको परिणामस्वरूप छालामा सूर्यको पराबैंगनी (यूभी) किरणको प्रत्यक्ष असर पर्छ, जसले ट्यानिङ, डार्क स्पट, समयभन्दा अगावै चाउरिपन र छालाको क्षति निम्त्याउन सक्छ ।

छाला विशेषज्ञहरूका अनुसार सनस्क्रिन केवल बिहान एकपटक लगाएर पुग्दैन । यदि लामो समयसम्म बाहिर बस्नुहुन्छ भने हरेक दुईदेखि तीन घण्टामा सनस्क्रिनको पुनः प्रयोग गर्नुपर्छ । तर मेकअप गरिसकेपछि सनस्क्रिन कसरी लगाउने भन्ने कुरा धेरैलाई थाहा हुँदैन । सही विधि अपनाएमा मेकअप नबिगारी पनि छालालाई घामबाट सुरक्षित राख्न सकिन्छ ।

मेकअपमाथि पनि प्रयोग गर्न सकिन्छ सनस्क्रिन

विशेषगरी गर्मी मौसममा मेकअप बिग्रिने डरले धेरै महिलाहरू सनस्क्रिन पुनः लगाउन हिच्किचाउँछन् । तर मेकअप गरिसकेपछि पनि सनस्क्रिन प्रयोग गर्न सकिन्छ । यसका लागि सही प्रकारको सनस्क्रिन छनोट गर्नु र सही तरिकाले प्रयोग गर्नु अत्यन्त आवश्यक हुन्छ ।

विशेष गरी गर्मी, वर्षायाम वा लामो समय बाहिर बस्नुपर्ने अवस्थामा सनस्क्रिन पुनः प्रयोग नगर्दा छालामा ट्यानिङ, पिग्मेन्टेसन र अन्य समस्या देखिन सक्छन् । त्यसैले मेकअपभन्दा छालाको सुरक्षा अझ महत्वपूर्ण मानिन्छ ।

सनस्क्रिन स्प्रे उत्कृष्ट विकल्प

मेकअप नबिगारी सनस्क्रिन पुनः लगाउन चाहनुहुन्छ भने साधारण क्रिम सनस्क्रिनभन्दा सनस्क्रिन स्प्रे उपयुक्त हुन्छ । स्प्रे गर्दा अनुहारबाट करिब १५–२० सेन्टिमिटर टाढा राखेर सबैतिर उस्तै मात्रामा छर्कनुपर्छ । त्यसपछि केही मिनेट सुक्न दिनुपर्छ । सुकिसकेपछि मात्र अनुहार छुनु वा मास्क लगाउनु राम्रो हुन्छ ।

स्प्रे प्रयोग गर्दा आँखामा नपरोस् भन्ने कुरामा विशेष ध्यान दिनुपर्छ ।

सनस्क्रिन पाउडर पनि प्रभावकारी

बजारमा पाइने सनस्क्रिन पाउडर पनि मेकअप गर्नेहरूका लागि निकै राम्रो विकल्प हो । यसलाई हल्का ब्रसको सहायताले अनुहारमा समान रूपमा लगाउन सकिन्छ । यसले घामबाट सुरक्षा दिनुका साथै अतिरिक्त तेल र पसिना सोस्ने भएकाले मेकअप लामो समयसम्म ताजा देखिन्छ । विशेष गरी तैलीय छाला भएका व्यक्तिका लागि यो उपयोगी मानिन्छ ।

सनस्क्रिन लगाउँदा सही एसपीएफ छनोट गर्नुपर्छ

विशेषज्ञहरूका अनुसार दैनिक प्रयोगका लागि कम्तीमा एसपीएफ ३० भएको ब्रड–स्पेक्ट्रम सनस्क्रिन उपयुक्त हुन्छ । यदि लामो समयसम्म घाममा बस्नुपर्ने अवस्था छ भने एसपीएफ ५० भएको सनस्क्रिन प्रयोग गर्न सकिन्छ । साथै, यूभीए र यूभीबी दुवै किरणबाट सुरक्षा दिने उत्पादन छनोट गर्नु राम्रो हुन्छ ।

मेकअपलाई लामो समय टिकाउने उपाय

गर्मीका कारण अनुहारमा धेरै पसिना आउँदा मेकअप पग्लिन सक्छ । यस्तो अवस्थामा अनुहारलाई बारम्बार रगड्ने वा वेट वाइप्सले जोडसँग पुछ्ने गल्ती गर्नु हुँदैन । यसले मेकअप मात्र होइन, सनस्क्रिनको तह पनि हटाइदिन सक्छ । यसको सट्टा ब्लोटिङ पेपर वा सफा टिस्यु पेपरले हल्का थिच्दै पसिना सोस्नुपर्छ । आवश्यक परे त्यसपछि सनस्क्रिन स्प्रे वा सनस्क्रिन पाउडर पुनः प्रयोग गर्न सकिन्छ । यसले मेकअपलाई पनि ताजा र राम्रो देखाउँछ ।

यी गल्ती गर्नु हुँदैन

–मेकअपमाथि बाक्लो तहमा सनस्क्रिन क्रिम नलगाउने ।

–धेरै पसिना आएपछि अनुहारलाई पटक–पटक धुने बानीबाट बच्ने ।

–म्याद गुज्रिएको सनस्क्रिन प्रयोग नगर्ने ।

–बिहान एकपटक मात्र सनस्क्रिन लगाएर दिनभर सुरक्षित हुन्छु भन्ने सोच नराख्ने । सनस्क्रिनलाई समय समयमा पुन प्रयोग गर्ने ।

–घाम नभएको दिन वा घरभित्र बसेको बेला सनस्क्रिन आवश्यक पर्दैन भन्ने भ्रममा नपर्ने । यूभी किरण झ्यालबाट समेत छिर्न सक्छ ।

छालाको सुरक्षालाई प्राथमिकता दिने

सुन्दर मेकअपभन्दा स्वस्थ छाला अझ महत्वपूर्ण हुन्छ । त्यसैले मेकअप बिग्रिने डरले सनस्क्रिन प्रयोग गर्न छाड्नु हुँदैन । सही प्रकारको सनस्क्रिन छनोट गर्ने, समय–समयमा पुनः प्रयोग गर्ने र छालाको प्रकारअनुसार उत्पादन प्रयोग गर्ने बानीले छालालाई घामको हानिकारक असरबाट जोगाउनुका साथै मेकअपलाई पनि लामो समयसम्म आकर्षक राख्न मद्दत गर्छ ।

दिनभर बाहिर बस्नुपर्ने महिलाहरूका लागि सनस्क्रिन स्प्रे वा सनस्क्रिन पाउडर सबैभन्दा सहज र प्रभावकारी विकल्प मानिन्छ ।