श्रीमतीको हत्यापछि श्रीमानले गरे आत्महत्या

१८ कात्तिक, दाङ । दाङमा एक युवकले श्रीमतीको हत्यापछि आत्महत्या गरेका छन् ।

घोराही उपमहानगरपालिका–१३ डुमरगाउँका ३६ वर्षीय नवीन रोकामगरले ३७ वर्षीया श्रीमती निरु रोकाको हत्या गरेपछि आत्महत्या गरेको जिल्ला प्रहरी कार्यालय दाङका डीएसपी राजनकुमार गौतमले जानकारी दिए ।

बिहीबार राति आफन्तको घरमा बास बस्न गएका दुवैजना शुक्रबार बिहान मृत फेला परेका हुन् ।
डीएसपी गौतमका अनुसार राति सँगै सुतेका नवीनले निरुको घाँटी थिचेर हत्या गरेपछि आफू अर्को कोठामा गएर झुण्डिएर आत्महत्या गरेका हुन् ।

घरायसी विवाद हत्याको कारण हुनसक्ने प्रहरीको अनुमान छ । घटनाबारे थप अनुसन्धान भइरहेको प्रहरीले जनाएको छ ।