मध्यान्हसम्म मतदानमा उत्साह छैन : राजेन्द्र लिङ्देन

४ मंसिर, झापा । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले मध्यान्हसम्म मतदाताको सहभागिता उत्साहपूर्ण नरहेको बताएका छन् ।

झापाको हल्दिबारी गाउँपालिका-१ को वडा कार्यालयमा मतदान गरेपछि उनले मतदाताको उत्साहपूर्ण सहभागिता नरहेको बताए । अध्यक्ष लिङ्देनले भने, ‘१२ बजेसम्म मतदानको माहोल उत्साहपूर्ण छैन । अब बढ्दै जान्छ भन्ने अनुमान हो ।’

उनले नेपाली कांग्रेसका पूर्वमहानमन्त्री कृष्णप्रसाद सिटौलासँग चुनावमा प्रतिस्पर्धा गर्न पाउनु आफ्नो लागि ठूलो कुरा भएको समेत बताए । २०७४ को निर्वाचनमा झापा क्षेत्र नम्बर ३ मा सिटौलालाई हराएका लिङ्देन यसपटक पनि सिटौलासँग प्रतिस्पर्धामा छन् ।

दलका नेताहरुसँग असन्तुष्ट भएर धेरै जना स्वतन्त्र उम्मेदवार बनेको भन्दै लिङ्देनले यस्तो हुनुको कारणबारे समीक्षा गर्ने बताए ।