एमालेका शक्तिशाली पदाधिकारी हारे, कांग्रेसलाई कम क्षति

काठमाडौं । प्रतिनिधिसभा र प्रदेशसभामा चुनावको मतगणना सकिने क्रममा छ । प्रतिनिधिसभातर्फ अब परिणाम आउन ३८ निर्वाचन क्षेत्रको मात्र बाँकी छ । प्रत्यक्षतर्फ नेपाली कांग्रेस, नेकपा एमाले, नेकपा माओवादी केन्द्र लगायत प्रमुख शक्तिका रुपमा रहेका छन् । नयाँ शक्तिका रुपमा राष्ट्रिय स्वतन्त्र पार्टी उदाएको छ ।

चुनावी प्रतिस्पर्धामा गएका एमाले, कांग्रेस, माओवादी केन्द्र र एकीकृत समाजवादी पार्टीका धैरै पदाधिकारी निर्वाचित भएका छन् भने केही पराजित पनि । ती सबै पार्टीका अध्यक्ष भने निर्वाचित भएका छन् ।

यो समाचार तयार पार्दासम्म एमाले, कांग्रेस र माओवादी केन्द्रका ५/५ पदाधिकारीले चुनाव जितेका छन् । एकीकृत समाजवादीका चार जनाले चुनाव जितेका छन् ।

पराजित हुनेमा भने कांग्रेस, माओवादी केन्द्र र एकीकृत समाजवादी भन्दा एमालेका पदाधिकारी धेरै छन् । एमालेका ५, कांग्रेसका ३, माओवादीका २ र एकीकृत समाजवादीका १ पदाधिकारीको चुनावी नतिजा आउन बाँकी छ ।

एमालेका शक्तिशाली पदाधिकारी पराजित

यो निर्वाचनमा एमालेका भावी नेतृत्वका रुपमा हेरिएका र पार्टीभित्र प्रभाव राख्ने शक्तिशाली पदाधिकारीहरु पराजित भएका छन् ।

वरिष्ठ उपाध्यक्ष ईश्वर पोखरेल, उपाध्यक्ष सुरेन्द्र पाण्डे, महासचिव शंकर पोखरेल, उपमहासचिव प्रदीप ज्ञवाली, सचिव लेखराज भट्ट पराजित भएका छन् । यी सबै एमाले अध्यक्ष केपी शर्मा ओलीको टिमभित्र प्रभाव राख्ने नेताहरु मानिन्छन् ।

प्रभावशाली उपाध्यक्षहरु सुवास नेम्वाङ, विष्णु पौडेल तथा सचिवहरु छविलाल विश्वकर्मा र पद्मा अर्यालको चुनावी फैसला हुन बाँकी छ । यो समाचार तयार पार्दासम्म नेम्वाङ, पौडेल र विश्वकर्माले अग्रता लिइरहेका छन् । अर्यालको क्षेत्रमा मतगणना नै हुन सकेको छैन ।

उपाध्यक्षहरु युवराज ज्ञवाली, अष्टलक्ष्मी शाक्य, रामबहादुर थापा बादल तथा उपमहासचिव विष्णु रिमालले भने चुनावी प्रतिस्पर्धामा भाग लिएनन् ।

कांग्रेसलाई कम क्षति

प्रभावशाली पदाधिकारी जोगाउन भने नेपाली कांग्रेस सफल भएको छ । नेपाली कांग्रेसका उपसभापतिद्वयमध्ये पूर्णबहादुर खड्का विजयी भइसकेका छन् । अर्का सभापति धनराज गुरुङको क्षेत्रमा मतगणना हुन बाँकी छ ।

एमाले र माओवादीका महासचिव पराजित हुँदा नेपाली कांग्रेसका दुई शक्तिशाली महामन्त्री विश्वप्रकाश शर्मा र गगन थापाले चुनाव जितेका छन् । त्यस्तै सहमहामन्त्रीहरुमा किशोरसिंह राठोर निर्वाचित भएका छन् । तीन सहमहामन्त्री भीष्मराज आङदेम्बे, महालक्ष्मी उपाध्याय ‘डिना’ र उमाकान्त चौधरी भने पराजित भएका छन् ।

दुई सहमहामन्त्री महेन्द्र यादव र बद्री पाण्डेको नतिजा आउन बाँकी छ । यादवले धनुषा–४ मा अग्रता लिइरहेका छन् भने पाण्डेका क्षेत्र बाजुरामा विवादका कारण मतदान नै बाँकी छ । सहमहामन्त्रीद्वय जीवन परियार र फरमुल्ला मन्सुर भने चुनावमै गएनन् । उनीहरु नेपाली कांग्रेसको समानुपातिक सूचीमा समेटिएका छन् ।

माओवादीका महासचिव, एकीकृत समाजवादीका उपमहासचिव पराजित

माओवादी केन्द्रका महासचिव देव गुरुङ, उपमहासचिव पम्फा भुसाल र सचिव चक्रपाणि खनाल पराजित भएका छन् । उपमहासचिवत्रय वर्षमान पुन, जनार्दन शर्मा र शक्ति बस्नेत निर्वाचित भएका छन् । उपमहासचिवद्वय गिरिराजमणि पोखरेल र मातृका यादवको नतिजा आउन बाँकी छ । यो समाचार तयार पर्दासम्म पोखरेलले अग्रता लिइरहेका छन् भने यादव पछाडि परेका छन् ।

एकीकृत समाजवादीका उपमहासचिव जगन्नाथ खतिवडा र सचिव रामकुमारी झाँक्री पराजित भएका छन् । उपाध्यक्ष राजेन्द्र पाण्डे, उपमहासचिव प्रकाश ज्वाला निर्वाचित भएका छन् । त्यस्तै सचिव राजेन्द्रकुमार राई भोजपुरबाट प्रदेशसभा सदस्यमा निर्वाचित भएका छन् ।

एकीकृत समाजवादीका सम्मानित नेता झलनाथ खनालको भने अन्तिम नतिजा आउन बाँकी छ । यो समाचार तयार पर्दासम्म उनी इलाम–१ मा नेकपा एमालेका महेश बस्नेतभन्दा पछाडि परेका छन् ।

माओवादी र एकीकृत समाजवादीका धेरै पदाधिकारी प्रतिस्पर्धा बाहिर

केही पदाधिकारीले जिते पनि माओवादी केन्द्र र एकीकृत समाजवादीका धेरै पदाधिकारी भने चुनावी मैदानमै उत्रिएनन् ।

एमालेका ४ र कांग्रेसका २ पदाधिकारीले चुनावमा भाग नलिंदा माओवादी केन्द्रका ११ जना पदाधिकारी प्रतिस्पर्धा बाहिर रहे । त्यस्तै एकीकृत समाजवादीका ८ जना पदाधिकारी प्रतिस्पर्धामा उत्रिएनन् ।

माओवादी केन्द्रका वरिष्ठ उपाध्यक्ष नारायणकाजी श्रेष्ठ राष्ट्रियसभा सदस्य छन् भने उपाध्यक्ष कृष्णबहादुर महराले चुनावमा जाने इच्छा नै देखाएनन् । उपमहासचिव हरिबोल गजुरेलले टिकट नै पाएनन् भने सचिव हितराज पाण्डे समानुपातिकमा छन् ।

सचिवहरु दीनानाथ शर्मा, लीलामणि पोखरेल, हितमान शाक्य, राम कार्की र डिलाराम आचार्य प्रतिस्पर्धामै गएनन् । त्यस्तै कोषाध्यक्ष श्रीराम ढकाल पनि चुनावी प्रतिस्पर्धामा गएनन् ।

एकीकृत समाजवादीकी उपाध्यक्ष जयन्ती राई राष्ट्रियसभा सदस्य छिन् । उपाध्यक्षहरु प्रमेश हमाल, घनेन्द्र बस्नेत, केदार न्यौपाने र केशवलाल श्रेष्ठ चुनावी प्रतिस्पर्धामा गएनन् । त्यस्तै महासचिव बेदुराम भुसाल तथा उपमहासचिवद्वय विजय पौडेल र गंगालाल तुलाधर प्रतिस्पर्धामै गएनन् । सचिव नागेन्द्र चौधरीले पनि चुनाव लडेनन् ।

नेकपा एमालेका पदाधिकारी

जसले जिते (५)

केपी शर्मा ओली

पृथ्वीसुब्बा गुरुङ

टोपबहादुर रायमाझी

गोकर्ण बिष्ट

योगेश भट्टराई

जो पराजित भए (५)

ईश्वर पोखरेल

सुरेन्द्र पाण्डे

शंकर पोखरेल

प्रदीप ज्ञवाली